«КОРВОНИ КИТОБ». Сафари он дар шаҳру ноҳияҳои вилояти Суғд ба роҳ монда мешавад

ДУШАНБЕ, 25.04.2023 /АМИТ «Ховар»/. Корхонаи давлатии таъминот ва савдои «Китоб» бо мақсади дар амал татбиқ намудани банди 24-и «Барномаи давлатии рушди муассисаҳои фарҳангии Ҷумҳурии Тоҷикистон барои солҳои 2021-2025», ки бо Қарори Ҳукумати Ҷумҳурии Тоҷикистон аз 3 апрели соли 2021 тасдиқ гардидааст, сафари «Корвони китоб» ба шаҳру ноҳияҳои вилояти Суғд»-ро оғоз менамояд. Дар ин хусус АМИТ «Ховар» бо истинод ба маркази матбуоти Вазорати фарҳанги Ҷумҳурии Тоҷикистон хабар медиҳад.

Сафари «Корвони китоб» дар шаҳру ноҳияҳои вилояти Суғд, аз ҷумла шаҳрҳои Хуҷанд, Исфара, Гулистон, Конибодом, Истиқлол, Панҷакент, Бӯстон, Истаравшан ва ноҳияҳои Айнӣ, Шаҳристон, Кӯҳистони Мастчоҳ, Ашт, Зафаробод, Деваштич, Спитамен, Бобоҷон Ғафуров ба роҳ монда мешавад.

Дар ин сафар аз ҳисоби «Барномаи давлатии рушди муассисаҳои фарҳангии Ҷумҳурии Тоҷикистон барои солҳои 2021-2025» 18  ҳазору 962 нусха китоб ба маблағи 142 ҳазору 650 сомонӣ аз осори адибони классику муосир ва ҷаҳон, асарҳои назмиву насрии бадеӣ, илмӣ-оммавӣ, бачагона ба тариқи ройгон ба 20 китобхонаи марказонидаи шаҳру ноҳияҳои вилояти Суғд дастрас карда мешавад.

АКС: Маркази матбуоти Вазорати фарҳанг