«САД РАНГИ ЧАКАН». Дар ноҳияи Ховалинг фестивали ҷумҳуриявӣ баргузор карда шуд

Апрель 24, 2023 19:02

ХОВАЛИНГ, 24.04.2023 /АМИТ «Ховар»/. 19 апрел дар ноҳияи Ховалинг Фестивали ҷумҳуриявии «Сад ранги чакан» доир карда шуд, хабар медиҳад мухбири минтақавии АМИТ «Ховар» Сулаймон Холзода.

Баҳри иштирок дар фестивал гулдухтарон, чеварон ва ҳунармандони ноҳияи Ховалинг дар боғи Нишону Парчами давлатии ноҳия бо куртаҳои чакан ҷамъ омаданд. Онҳо нахуст дар аксияи «Тоҷикона мепӯшем» иштирок карда, намудҳои гуногуни либосҳои миллиро нишон доданд.

Ҳунармандону чеварон аз маркази ноҳия ва ҷамоатҳои деҳот намоишгоҳи маҳсулоти чаканро ба маърази дид гузоштанд. Дар нақши чакан зебоиҳо ва манзараҳои табиати диёрамон таҷассум ёфтааст. Дар намоишгоҳ намудҳои гуногуни либосҳои занона, миёнбанд, либосҳои кӯдакона, болишту бардевориҳо бо нақшҳои чакан гузошта шуда буд.

Сокини ноҳияи Ховалинг Садафмо Назарова иброз дошт, ки «чакан ифодакунандаи мероси гаронбаҳо ва бозгӯи таъриху фарҳанги оламшумули миллати тоҷик буда, тасвиру рангҳои он, ки аз ҷониби тарроҳону наққошон рӯи матоъ ба қалам дода мешавад, рамзу маънии зебоипарастию хаёлоти рангини занони тоҷикро ифода менамояд».


Вобаста ба талаботи озмун иштирокчиён дар ҳамаи номинатсияҳо фаъолона иштирок намуданд. Шуруъ аз либоси чакани кӯдакона то чакани қадимӣ намоиш дода шуд, ки нақши ҳар яки он аз ҳамдигар фарқ мекард.

Ба ҳам омадани бонувони чаканпӯш дар ин базмгоҳ, ки дар пероҳану кашидадӯзиҳояшон воқеан сад ранг таҷассум ёфта буд, аз санъати волою ҳунари чакандӯзии занони ҳамаи ҷамоатҳои ноҳия башорат медод.

Дар ҷамъбасти фестивали «Сад ранги чакан» дар ноҳияи Ховалинг иброз дошта шуд, ки мақсади асосии фестивал намоиши чакан, ҳифз, нигаҳдошту густариши ҳунари волои мардуми тоҷик ва пешгирӣ аз бегонапарастӣ мебошад. Акнун беҳтаринҳо дар даври вилоятӣ ҳунари худро нишон хоҳанд дод.

АКС: АМИТ «Ховар»

Апрель 24, 2023 19:02

Хабарҳои дигари ин бахш

Дар Донишкадаи давлатии фарҳанг ва санъат бо мақсади татбиқи Консепсияи миллии тарбия вохӯрӣ доир шуд
Китобҳои ноширони тоҷик ба Намоишгоҳи байналмилалии «Китоби Абузабӣ» пешниҳод шуданд
Ҳунарманди халқии Тоҷикистон Асланшоҳ Раҳматуллоев аз олам даргузашт
«ДАСТХАТҲОИ ҚАЛЪАИ МУҒ». Нодиртарин ёдгориҳои Тоҷикистон ба рӯйхати «Ҳофизаи ҷаҳонӣ»-и созмони ЮНЕСКО дохил гардиданд
Дар Тоҷикистон ҳунари балети Узбекистон муаррифӣ карда мешавад
Дар Ҷумҳурии Мардумии Чин Рӯзҳои фарҳанги Ҷумҳурии Тоҷикистон оғоз гардид
Дар шаҳри Панҷакент Боғи фарҳангию фароғатии ба номи Абулқосим Фирдавсӣ бунёд карда мешавад
«УМРЕ БО МУСИҚӢ». Дар Душанбе ҳамоиши илмӣ баргузор гардид
Ба гиромидошти асосгузори мактаби классикии шеър-мусиқии замони Сомониён Абулаббоси Бахтиёр симпозиуми байналмилалӣ доир шуд
Дар Ҳисор маҳфил-озмуни «Шоҳнома Ватан аст!» оғоз гардид
Директори Хадамоти федералии приставҳои судии Федератсияи Русия бо таъриху тамаддуни тоҷикон шинос шуд
Дар Китобхонаи миллӣ даври аввали озмуни «Фурӯғи субҳи доноӣ китоб аст» баргузор гардид