«ТУ ҚАЛБИ ТОҶИКИСТОНӢ, ДУШАНБЕ». Таҳти ин унвон кормандони мақомоти милитсияи пойтахт маҳфили маърифати ватандӯстӣ баргузор намуданд

Апрель 15, 2023 15:14

ДУШАНБЕ, 15.04.2023. /АМИТ «Ховар»/. Дар Раёсати Вазорати корҳои дохилӣ дар шаҳри Душанбе бахшида ба Рӯзи Пойтахт маҳфили маърифати ватандӯстӣ таҳти унвони «Ту қалби Тоҷикистонӣ, Душанбе» бо иштироки аҳли зиё ва роҳбарияту ҳайати шахсии милитсияи пойтахт доир карда шуд. Дар ин хусус ба АМИТ «Ховар» дар Раёсати ВКД дар Душанбе хабар доданд.

Таъкид гардид, ки тӯли чанд соли охир зери роҳбарии хирадмандонаи Раиси шаҳри Душанбе муҳтарам Рустами Эмомалӣ пойтахти мамлакат ба марҳилаи нави пешрафту тараққиёт ворид гардида, дар тамоми самтҳо инфрасохтори зарурӣ таъмин ва воқеъан ба шаҳри гулҳо табдил ёфтааст.

Тазаккур дода шуд, ки бо мақсади пойдор нигоҳ доштани ин ҳама дастовардҳо ва боз ҳам ба пешрафтҳои нав ба нав ноил гардидан, ҳар як шаҳрвандро зарур аст, ки бо дарки баланди масъулиятшиносӣ қарзи шаҳрвандии худро иҷро намуда, ҷиҳати мутараққӣ ва ободу зебо нигоҳ доштани шаҳри Душанбе саҳми арзандаи худро гузоранд. Зеро ин ҳама дастовардҳо дар натиҷаи талошу заҳматҳо ба даст омада, ҳар яки моро мебояд барои ба наслҳои оянда ба мерос гузоштани як мулки ободу зебо талош намоем.

Дар идомаи чорабинӣ оид ба таърихи пайдоиш ва рушду тараққиёти имрӯзаи пойтахти мамлакат — шаҳри Душанбе маърӯзаҳои пурмуҳтаво карда шуд.


Гуфта шуд, ки Душанбе хонаи умеди ҳазорон нафар миллати тоҷик ба шумор рафта, дар заминаи сиёсати хирадмандона ва бунёдкоронаи Пешвои муаззами миллат муҳтарам Эмомалӣ Раҳмон ва Раиси шаҳр муҳтарам Рустами Эмомалӣ рӯз аз рӯз ободу зебо гардидааст. Сохта ба истифода додани бинову иншооти наву замонавӣ, таъмиру навсозии роҳҳо, марказҳои хизматрасонӣ, майдончаҳои варзишӣ ва корхонаву коргоҳҳои истеҳсолӣ дар шаҳри Душанбе рушди пойтахтро таъмин намуда, барои сокинону меҳмонон шароити созгори зиндагонӣ муҳайё гаштааст.

Дар қисмати дигари чорабинӣ шоири халқии Тоҷикистон Муҳаммад Ғоиб дар васфи ватандориву меҳанпарстӣ, пешрафту шукуфоӣ ва талошу заҳматҳои шабонарӯзии фарзандони барӯманди миллати тоҷик аз эҷодиёти пурғановати хеш порчаҳои шеърӣ қироат намуд. Мавсуф таъкид дошт, ки мояи фараҳмандии ҳар як сокини пойтахт аст, ки  шаҳри Душанбе бо идеяҳои тозаи муҳтарам Рустами Эмомалӣ симояшро куллан дигар намуда, ба шаҳри афсонавӣ ва зебоманзари сайёра табдил ёфтааст. Ин ҳама гулу шукуфаҳои Душанбе бори дигар гувоҳи мамлакати биҳиштосо будани Ҷумҳурии Тоҷикистон аст.

Ҳамзамон таъкид гардид, ки кормандони мақомоти милитсияи шаҳри Душанбе бо ифтихору садоқат ба савганди хеш баҳри пойдор нигоҳ доштани ин ҳама дастовардҳо, таъмини волоияти қонун, суботу оромӣ ва тартиботи ҷамъиятӣ пайваста талош менамоянд.

АКС: Раёсати ВКД дар Душанбе

Апрель 15, 2023 15:14

Хабарҳои дигари ин бахш

Дар Тоҷикистон назорат барои таваққуфи нодуруст дар ҷойҳои манъшуда пурқувват карда шуд
Дар Душанбе Маркази зиддимухаддиротии Созмони ҳамкории Шанхай таъсис меёбад
Дар Душанбе Маркази тамоси электронӣ оид ба қабули муроҷиатҳо ташкил карда шуд
АМАЛИЁТИ «БАЧАҲО». Бо мақсади пешгирии ҳодисаҳои роҳу нақлиёт бо иштироки кӯдакону наврасон гузаронида мешавад
Сатҳи забондонии кормандони милитсияи Хатлон санҷида мешавад
Дар шаш моҳ дар Тоҷикистон 495 ҳолати машғул шудан ба ҷодугарӣ ва фолбинӣ ошкор карда шуд
«МАДАНИЯТИ ШАҲРДОРӢ». Дар Хатлон бо мақсади таҳким бахшидани ҳамкорӣ бо аҳолӣ амалиёт гузаронида шуд
Дар Душанбе татбиқи марҳилаи дуюми лоиҳаи «Шаҳри бехатар» баррасӣ гардид
Дар Хатлон масъалаҳои ҳифзи тартиботи ҷамъиятӣ баррасӣ карда шуданд
Дар Вазорати мудофиаи Тоҷикистон тарҳрезии либоси хизматчиёни ҳарбӣ дар шакли ягонаи миллӣ баррасӣ гардид
Сатҳи забондонии кормандони Вазорати корҳои дохилӣ санҷида мешавад
ДАСТОВАРДИ ДАВРОНИ СОҲИБИСТИҚЛОЛӢ. Ба таъсиси Кумитаи ҳолатҳои фавқулода ва мудофиаи граждании Тоҷикистон 31 сол пур шуд