Дар Бонки миллии Тоҷикистон Маркази байналмилалии баҳодиҳии хавфҳо таъсис дода мешавад

ДУШАНБЕ, 11.05.2023 /АМИТ «Ховар»/.  Интизор меравад, ки  дар оянда дар Бонки миллии Тоҷикистон Маркази байналмилалии баҳодиҳии хавфҳо таъсис дода шавад. Ин матлаб дар Душанбе зимни вохӯрии намояндагони Департаменти мониторинги молиявии Бонки миллии Тоҷикистон  ва Хадамоти федералии мониторинги молиявии Федератсияи Русия, ки дар он самтҳои асосии ҳамкорӣ  байни ин ду ниҳод баррасӣ шуд, баён гардид.

АМИТ «Ховар» бо истинод ба Бонки миллии Тоҷикистон иттилоъ медиҳад, ки вохӯрии мазкур дар доираи муаррифии Маркази байналмилалии баҳодиҳии хавфҳои қонунигардонии (расмикунонии) даромадҳои бо роҳи ҷиноят бадастоварда ва маблағгузории терроризм доир шуда, мусоҳибон Консепсияи бахши бехатарии молиявӣ, вазифаю самтҳои асосии ҳамкорӣ, инчунин тартиби муайян кардани таҳдидҳои фавқулмиллиро дар асоси ин  Консепсия муҳокима намуданд.

Ҳамзамон дар вохӯрӣ истифодаи амалии фаъолияти Маркази байналмилалии баҳодиҳии хавфҳо, вазифаҳои асосии он, захираҳо ва усули таҳлил дар заминаи захираҳои маркази мазкур нишон дода шуд. Тадбирҳои ташкилию ҳуқуқӣ барои таъсиси Маркази байналмилалии баҳодиҳии хавфҳо дар айни замон дар ҳолати ниҳоӣ қарор дошта, лоиҳаи созишномаи он аз расмиёти дохилидавлатӣ  гузашта истодааст.

Баъди аз расмиёт гузаштани ин санад дар Бонки миллии Тоҷикистон Маркази байналмилалии баҳодиҳии хавфҳо таъсис дода мешавад.

АКС: Бонки миллии Тоҷикистон