Дар водии Яғноби ноҳияи Айнӣ ду пули мошингузар сохта мешавад

ДУШАНБЕ, 22.06.2023 /АМИТ «Ховар»/. Дар асоси дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати дар сатҳи баланд истиқбол гирифтани 35-солагии Истиқлоли давлатии Ҷумҳурии Тоҷикистон 21 июн дар ҳудуди водии Яғноби Ҷамоати деҳоти Анзоби ноҳияи Айнӣ ба сохтмони ду пули мошингузар санги асос гузошта шуд. Дар ин хусус АМИТ «Ховар» бо истинод ба мақомоти иҷроияи ҳокимияти давлатии ноҳия хабар медиҳад.

Иттилоъ дода шуд, ки ин ду пул то 9 сентябри соли 2023 дар арафаи Ҷашни Истиқлоли давлатӣ мавриди истифода қарор дода мешаванд. Дарозии пулҳои мошингузар мувофиқи нақша 25 ба 4 ва 8 ба 4 метри мураббаъро дар бар мегирад.

Зимни гузоштани санги асос таъкид гардид, ки бунёди пулҳои мазкур барои рушди хоҷагии қишлоқ нақши муҳим дошта, ба зиндагии шоистаи мардуми дараи Яғноб мусоидат менамояд ва дастрасии аҳолӣ дар чор фасли сол имконпазир хоҳад гашт.

АКС: Мақомоти иҷроияи ҳокимияти давлатии ноҳияи Айнӣ