Маҳсулоти кишоварзӣ, таомҳои миллӣ ва ҳунарҳои мардумии шаҳри Конибодом ба меҳмонону сокинони пойтахт намоиш дода шуд

ДУШАНБЕ, 03.07.2023 /АМИТ «Ховар»/. 2 июл дар Муассисаи давлатии «Боғи Ирам»-и шаҳри Душанбе бо ташаббусти Мақомоти иҷроияи ҳокимияти давлатии шаҳри Конибодом намоиш-фурӯши маҳсулоти кишоварзӣ, таомҳои миллӣ ва ҳунарҳои мардумӣ доир гардид.

Дар намоиш-фурӯши маҳсулоти кишоварзӣ, таомҳои миллӣ ва ҳунарҳои мардумӣ намояндагони Дастгоҳи иҷроияи Президенти Ҷумҳурии Тоҷикистон, роҳбарияти Мақомоти иҷроияи ҳокимияти давлатии шаҳри Конибодом, мақомоти иҷроияи ҳокимияти давлатии ноҳияи Исмоили Сомонӣ ва намояндагони дигар вазорату идораҳо иштирок намуданд.

Иштирокчиён дар саҳни боғ бо намоиши ҳунарҳои мардумии ҳунармандони шаҳри Конибодоми вилояти Суғд, ки бо санъати баланд оро дода шуда буд, шинос шуданд.

Ҳунармандон бо завқи баланд дар намоиши ҳунарҳои мардумии шаҳри Конибодом иштирок намуда, истеъдод ва ҳунари худро пешниҳоди сокинони пойтахт гардониданд.

АКС: Мақомоти иҷроияи ҳокимияти давлатии ноҳияи Исмоили Сомонӣ