НИШАСТИ МАТБУОТӢ. Ҳаҷми ММД дар Тоҷикистон беш аз 54 миллиард сомонӣ ва суръати рушди он зиёда аз 8 фоизро ташкил дод

ДУШАНБЕ, 15.08.2023 /АМИТ «Ховар»/. Ҳаҷми Маҷмуи маҳсулоти дохилӣ (ММД)-и ҷумҳурӣ дар шаш моҳи соли равон  54,2 миллиард сомонӣ ва суръати рушди он 8,3 фоизро ташкил дод. Дар ин хусус имрӯз дар нишасти матбуотӣ ба хабарнигорон Вазири молияи ҷумҳурӣ Файзиддин Қаҳҳорзода иттилоъ дод.

Вазир афзуд, ки дар ин давра рушд асосан аз ҳисоби истеҳсоли маҳсулоти саноатӣ 10,3 фоиз, гардиши бор 12,3 фоиз, гардиши мусофирон 19,6 фоиз, кишоварзӣ 7,9 фоиз, сохтмон 27,1 фоиз, гардиши савдо 11,8 фоиз ва хизматрасонии пулакӣ дар ҳамаи соҳаҳои хизматрасонӣ 5,5 фоиз таъмин гардид.

Таъкид шуд, ки ҳаҷми гардиши савдои хориҷӣ дар ин давра ба 3415,0 миллион доллари амрикоӣ баробар гардидааст, ки нисбат ба ҳамин давраи соли гузашта 98,1 миллион доллари амрикоӣ ё 2,8 фоиз кам мебошад. Дар давраи ҳисоботӣ аз ҷумҳурӣ ба маблағи 678,6 миллион доллари амрикоӣ молу маҳсулот содирот гардида, инчунин   ба мамлакат ба маблағи 2736,4 миллион доллари амрикоӣ молу маҳсулот ворид шудааст. Ин нисбат ба ҳамин давраи соли сипаришуда 438,4 миллион доллари амрикоӣ ё  беш аз 19 фоиз зиёд аст.

                                                                               Марзия САИДЗОДА,
АМИТ «Ховар»

                                                                                 АКС: АМИТ «Ховар