Сокинони минтақаи НБО «Роғун» ва мардуми шаҳраки Дарбанд кай бо оби нӯшокӣ таъмин мешаванд?

НУРОБОД, 01.08.2023 /АМИТ «Ховар»/. Нарасидани оби нӯшокӣ дар маркази ноҳияи Нуробод мушкилоти аввалиндараҷа ба ҳисоб меравад, зеро он солҳои зиёд аст, ки се ҳазор нафар сокинони муқимии шаҳраки Дарбанд ва зиёда аз 500 хонаводаи минтақаи Неругоҳи барқи обии «Роғун»-ро азият медиҳад. Масъулини ноҳия даҳҳо маротиба амалишавии лоиҳаҳои хати оби нӯшокии мавзеи Шолидара дар масофаи зиёда аз 8 км ва барқароршавии хати оби нӯшокии Сари Қошро ваъда медиҳанду мутаассифона, он татбиқ намегардад, то мушкилии ҷиддии мардум бартараф гардад, маркази шаҳраки Дарбанд сабзазор шаваду дарахтон  сабз шаванд. 

Хати оби нӯшокии мавзеи Шолидара мувофиқи татбиқи лоиҳа бояд бахшида ба ҷашни 30-солагии Истиқлолияти давлатӣ ба истифода дода мешуд, вале то имрӯз корҳои сохтмонии он ба анҷом нарасидаанд. Соли 2014 хати оби нӯшокии Сари Қош, ки 12-13 километр масофа дорад, бо харҷи як миллиону 50 ҳазор сомонӣ таъмири пурра шуд. Ҳарчанд ки зиёда аз ду соли охир корҳои барқарорсозии он идома доранд, вале аз сабаби солҳои тӯлонӣ истифода накардану корношоям гардидани таҷҳизот он то имрӯз фаъол нагардидааст.

Раиси ноҳияи Нуробод Додарҷон Ҷобирзода 28 июл зимни нишасти матбуотӣ дар Мақомоти иҷроияи ҳокимияти давлатии ноҳия ба саволи хабарнигори минтақавии АМИТ «Ховар» Субҳониддини Маҳмуд вобаста ба ин мушкилӣ иброз дошт, ки «дар мавзеъҳои гуногуни шаҳраки Дарбанд бо дастгирии соҳибкорони маҳаллӣ чоҳҳои амудӣ канда, ба истифода дода шудаанд. Ин чоҳҳо қисматҳои алоҳидаи марказро бо оби нӯшокӣ таъмин менамоянд. Ҳамчунин ҷиҳати барқарор намудани хати оби нӯшокии Сари Қош, ки аз даврони Шӯравӣ боқӣ монда буд, мо кӯшиш намуда, насосҳои обкаши онро таъмири пурра намудем. Вале дар натиҷаи санҷиш муайян гардид, ки бинобар сабаби солҳои тӯлонӣ истифода набурдани ин хати оби нӯшокӣ зиёда аз 300 метр қубури он пурра хароб гардидааст. Хушбахтона, манбаъҳои маблағгузорӣ барои хариди ин қубурҳоро пайдо намудем ва бо маблағи 45 ҳазор доллари амрикоӣ 300 метр қубурро ба ноҳия овардем ва ҳоло корҳои васл намудани он идома доранд.  Мо кӯшиш намуда истодаем, ки ин хати оби нӯшокӣ ҳарчӣ зудтар барқарор шавад, то мушкилоти мардум сари вақт бартараф гарданд».

 Субҳониддини МАҲМУД,
АМИТ «Ховар»

 АКС аз бойгонӣ