Дар Вазорати нақлиёт бахшида ба 32-солагии Истиқлолияти давлатӣ маҷлиси ботантана доир гардид

Сентябрь 9, 2023 16:44

ДУШАНБЕ, 09.09.2023 /АМИТ «Ховар»/. 8 сентябр дар Вазорати нақлиёти Ҷумҳурии Тоҷикистон бахшида ба 32-солагии Истиқлолияти давлатии Ҷумҳурии Тоҷикистон маҷлиси ботантана баргузор гардид, ки дар он роҳбарият ва кормандони вазорат, фаъолон ва собиқадорони соҳа иштирок намуданд. Дар ин хусус АМИТ «Ховар» бо истинод ба Вазорати нақлиёти Ҷумҳурии Тоҷикистон хабар медиҳад.

Ҷаласаро Вазири нақлиёти Ҷумҳурии Тоҷикистон Азим Иброҳим ифтитоҳ намуда, ҳозиринро бо муқаддастарин иди давлатамон — Рӯзи Истиқлолияти давлатии Ҷумҳурии Тоҷикистон, ки 9 сентябр 32-солагии он ҷашн гирифта мешавад ва Рӯзи роҳсозони мамлакат, ки якшанбеи дуюми моҳи сентябр таҷлил меёбад, самимона табрику таҳният гуфт. Мавсуф бо мисолҳои мушаххас аз рушди соҳаи роҳу нақлиёт дар солҳои соҳибистиқлолии мамлакат ёдовар шуд.

«Дар як вақт фаро расидани ин ду ҷашн то ҷое рамзӣ низ ҳаст, — иброз намуд Азим Иброҳим. — Зеро саҳми роҳдорону роҳсозон ва кормандони соҳаи нақлиёти мамлакат дар баланд бардоштани сатҳи зиндагии мардум ва рушду равнақи иқтисодиёти Тоҷикистон хеле калон аст».

Тавре таъкид гардид, дар тӯли 32 соли Истиқлолияти давлатӣ бо ташаббусу дастгирии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати беҳтар намудани вазъи роҳу шоҳроҳҳои мошингард ва ба давлати транзитӣ табдил додани Тоҷикистон корҳои бунёдӣ ба сомон расонида шуданд. Аз ҷумла, дар 5 соли охир дар соҳаи нақлиёт 13 лоиҳаи сармоягузории давлатӣ ба маблағи 5 миллиарду 130 миллион сомонӣ амалӣ гардида, дар натиҷа 250 километр роҳҳои мошингард, 237 пул, 2 чорроҳаҳои сесатҳа ва 2 дусатҳа, 6 нақби мошингузар, 3,4 км долонҳои зиддитармавӣ, инчунин 218,95 км хати роҳи оҳан, 5 пулу 3 нақби қаторагузар бунёду таҷдид ва 601 техника ва таҷҳизоти роҳнигоҳдорӣ харид гардид.

Ҳоло дар соҳа боз 17 лоиҳаи сармоягузории давлатӣ ба маблағи умумии 11 миллиард сомонӣ амалӣ гардида истодааст.

Дар се соли оянда 6 лоиҳа ба маблағи 7,4 миллиард сомонӣ ба анҷом расида, 317 километр роҳи байналмилалии мошингард, 32 пул, 5 нақб бо дарозии 11,2 километр ва 7 долон ба истифода дода мешавад.

Дар ҳамоиш ба муносибати таҷлили 32- солагии Истиқлолияти давлатӣ ва Рӯзи роҳсозон кормандон ва собиқадорони соҳаи роҳу нақлиёт, ки дар рушди соҳа хизматҳои арзанда намудаанд, бо унвони «Роҳсози фахрӣ», «Ифтихорнома» ва «Сипоснома»-и Вазорати нақлиёти Ҷумҳурии Тоҷикистон сарфароз гардонида шуданд. Аз ҷумла, 26 нафар бо нишони сарисинагии «Роҳсозӣ фахрӣ», 25 нафар бо «Ифтихорнома» ва 2 нафар бо «Сипоснома» -и Вазорати нақлиёти Ҷумхурии Тоҷикистон қадрдонӣ шуданд.

АКС: Вазорати нақлиёти Ҷумҳурии Тоҷикистон

Сентябрь 9, 2023 16:44

Хабарҳои дигари ин бахш

Беш аз 94 фоизи ҳамлу нақли бор дар Тоҷикистон тавассути нақлиёти автомобилӣ таъмин карда мешавад
«S&P Global Ratings рейтинги соҳибихтиёрии қарзии Тоҷикистонро бо дурнамои «устувор» тасдиқ намуд
Омодагӣ ба Форуми байналмилалии «Dushanbe Invest 2025» бо сафирони Чин, Туркия ва Арабистони Саудӣ баррасӣ гардид
Татбиқи барномаҳои миллӣ ва Ҳадафҳои рушди устувор баррасӣ карда шуд
Сарвари давлат Эмомалӣ Раҳмон бинои нави Раёсати Вазорати корҳои дохилии Ҷумҳурии Тоҷикистон дар шаҳри Душанберо мавриди истифода қарор доданд
Кишти чигит бо усули обёрии зери плёнка дар Тоҷикистон беш аз 21 ҳазор гектарро ташкил медиҳад
Агентии инноватсия ва технологияҳои рақамӣ рамзи расмии «Солҳои рушди иқтисоди рақамӣ ва инноватсия»-ро муаррифӣ менамояд
Пешвои миллат Эмомалӣ Раҳмон бинои нави Дастаи алоҳидаи таъйиноти махсуси милитсия «Шоҳин»-и Раёсати Вазорати корҳои дохилӣ дар шаҳри Душанберо ифтитоҳ намуданд
Дар Душанбе рушди ҳамкории тиҷоратию иқтисодӣ байни Тоҷикистону Чин баррасӣ гардид
ОМОДАГӢ БА СОЛИ НАВИ ТАҲСИЛ. Дар ноҳияи Рӯдакӣ 4 бинои асосию иловагии муассисаҳои таълимӣ ба истифода дода мешавад
Дар Алмато ҷаласаи Комиссияи байнидавлатии ҳамоҳангсозии хоҷагии оби Осиёи Марказӣ баргузор шуд
Дар Хуҷанд ҷаласа оид ба ҳолати истифодаи ғайриқонунии неруи барқ доир гардид