САЛОМ МАКТАБ! Имрӯз дар Тоҷикистон Рӯзи дониш оғоз ёфт
ДУШАНБЕ, 01.09.2023. /АМИТ «Ховар»/. Субҳи имрӯз чун анъана дар тамоми мактабҳо бо садо додани Суруди миллӣ ва ҷамъомади идона Рӯзи дониш оғоз гардида, хонандагон бо руҳияи болида дар муассисаҳои таълимӣ ба илму донишандӯзӣ шуруъ намуданд. Хабарнигори АМИТ «Ховар» дар ин лаҳзаҳо дар муассисаи таҳсилоти миёнаи умумии рақами 51-и ноҳияи Фирдавсии шаҳри Душанбе қарор дорад ва ба шодиву хурсандии хонандагону омӯзгорони ин мактаб шарик аст.
Дар ин лаҳзаҳо шодии дустрӯяконе, ки бори аввал ба ин боргоҳи илму маърифат қадам мениҳанд, ҳадду канор надорад. Зеро онҳо дар фазои сулҳу оромӣ ва Ваҳдату ҳамбастагӣ барои ояндаи дурахшони худ ва Ватани азиз таҳсилро шуруъ намуданд.
Субҳи барвақти имрӯз хонандагону омӯзгорони муассисаи таҳсилоти миёнаи умумии №51 дар саҳни мактаб ҷамъ омаданд. Аз баландгӯяк шеъри хеле машҳури Абдусалом Деҳотӣ «Эй булбулакони боғи дониш» ба таври мутантан қироат шуд:
Эй булбулакони боғи дониш,
Шодона таронаҳо муборак!
Боз омадааст фасли хониш,
Таҳсили нави шумо муборак!
Тавре директори мактаб Искандар Давлатов иброз дошт, дар соли нави таҳсил мактаби мазкур дари худро ба рӯи 2019 нафар хонанда боз намудааст, ки аз ин теъдод 129 нафарро хонандагони синфи якум ташкил медиҳанд.
Ба гуфтаи директори мактаб, дар муассиса 83 нафар омӯзгорони ботаҷриба таълим медиҳанд, ки шумораи онҳо нисбат ба соли гузашта 9 нафар зиёд мебошад. «Омӯзгорони муассиса ба соли таҳсили нав омодагии хуб дида, бо руҳияи тозаву масъулияти баланд хонандагонро пурра ба таълиму тарбия фаро мегиранд. Зеро дар раванди ҷаҳонишавӣ бе донистани илми муосир ягон давлат тараққӣ намуда наметавонад. Ҳамин аст, ки ба омӯзгорон пайваста таъкид менамоем, ки роҳу воситаҳои муосири таълимро омӯхта, ба хонандагон бо воситаҳои техникӣ кор баранд», -иброз дошт ӯ.
Имсол муассисаи мазкур аз ҷониби Мақомоти иҷроияи ҳокимияти давлатии шаҳри Душанбе ва дастгирии Раиси шаҳри Душанбе муҳтарам Рустами Эмомалӣ пурра аз таъмир бароварда шуда, бо таҷҳизоту воситаҳои таълимӣ, компютеру тахтаҳои электронӣ муҷаҳҳаз гардонида шуд. Ҳамчунин дар ин муассиса ҷиҳати омӯзиши дарсҳои забони англисӣ ва русӣ барои хонандагон тамоми шароити таълимӣ фароҳам оварда шудааст.
Ёдовар мешавем, ки 1 сентябр чун Рӯзи дониш дар ҳамаи кишварҳои аъзои Иттиҳоди Давлатҳои Мустақил таҷлил гардида, соли нави хониш дар ин рӯз бо дарси сулҳ оғоз мегардад.
Зарангези ЛАТИФ,
АМИТ «Ховар»
АКС: АМИТ «Ховар»
ИЛМУ МАОРИФ БА ОЯНДАИ БОСАОДАТИ ДАВЛАТУ МИЛЛАТ ТАВЪАМ АСТ. Андешаҳо дар ҳошияи Паёми Президенти Тоҷикистон ба Маҷлиси Олӣ
Ҷаласаи гурӯҳи кории Озмуни ҷумҳуриявии «Илм – фурӯғи маърифат» баргузор шуд
Дар Душанбе дар нуҳ сол беш аз 54 мактаб ва 42 муассисаи томактабӣ сохта шудааст
Оид ба тамоюлҳои рушди психологияи муосир ва татбиқи он дар низоми таҳсилоти рақамӣ конференсияи байналмилалӣ доир шуд
«ИЛМ – ФУРӮҒИ МАЪРИФАТ». Барои баргузории ин озмуни ҷумҳуриявӣ зиёда аз 9 миллион сомонӣ ҷудо гардид
Дар Донишгоҳи давлатии молия ва иқтисоди Тоҷикистон бахшида ба Рӯзи байналмилалии ҳадяи китоб ҳамоиш доир гардид
Бахшида ба «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» дар Душанбе конференсияи илмӣ доир шуд
Дар оянда дар маҳали Донишкадаи инноватсионии Душанбе шаҳраки донишҷӯён сохта мешавад
РУШДИ САНОАТИ ФАРМАТСЕВТИИ ВАТАНӢ. Дар Парки технологии Донишгоҳи миллии Тоҷикистон аз пӯсти меваи анор дору тайёр мекунанд
НИШАСТИ МАТБУОТӢ. Филиали Донишгоҳи энергетикии Москва дар шаҳри Душанбе соҳиби ду таҷҳизоти лабораторӣ аз фанни физика гардид
Байни Маркази барномаҳои байналмилалӣ ва King’s College London Ёддошти тафоҳум ба имзо расид
Дар Филиали Донишкадаи рушди менеҷменти Сингапур дар шаҳри Душанбе шумораи донишҷӯён меафзояд
