Президенти Шурои ҷаҳонии таҳаммулпазирӣ ва сулҳ бо ёдгориҳои Осорхонаи миллии Тоҷикистон шинос шуд

ДУШАНБЕ, 19.10.2023 /АМИТ «Ховар»/. Президенти Шурои  ҷаҳонии таҳаммулпазирӣ ва сулҳ Аҳмад ибни Муҳаммад ал-Ҷарван дар доираи сафар ба Ҷумҳурии Тоҷикистон бо ҳайати ҳамроҳаш ба тамошои Осорхонаи миллии Тоҷикистон омад, иттилоъ дод ба АМИТ «Ховар» сардори шуъбаи экскурсионӣ ва оммавии Осорхонаи миллии Тоҷикистон Фаридун Кенҷаев.

Барои ҳайати меҳмонон дар сатҳи баланд  сайри осорхонавӣ ташкил карда шуд.

Меҳмонон дар осорхона бо таърихи пурифтихори миллати тоҷик дар мисоли бозёфтҳои марбут ба «Асри санг», «Асри биринҷ», «Ҳахоманишиҳо», «Юнону Бохтар», «Кушониён», «Сосониён», «Ҳайтолиён», «Панҷакенти қадим», «Мероси хаттӣ», «Аҷинатеппа», «Сомониён», толорҳои «Кулолгарӣ», «Мисгарӣ», «Мардумшиносӣ», «Дастовардҳои замони соҳибистиқлолӣ» ва «Туҳфаҳои Президенти Ҷумҳурии Тоҷикистон» шинос  гардиданд.

Президенти Шурои ҷаҳонии таҳаммулпазирӣ ва сулҳ Аҳмад ибни Муҳаммад ал-Ҷарван аз тамошои толорҳои намоишӣ ва шиносии бештар бо таърихи куҳан ва фарҳанги пурғановати миллати тоҷик изҳори хушҳолӣ намуда, таассуроти худро дар китоби «Меҳмонони фахрӣ»-и Осорхонаи миллӣ дарҷ намуд.

АКС: Осорхонаи миллии Тоҷикистон