Ҷиҳати татбиқи Барномаи пешгирии фарбеҳӣ ва ташаккули ғизои солим дар Тоҷикистон дар Коллеҷи тиббии шаҳри Ҳисор ҳамоиш баргузор шуд

ҲИСОР, 06.11.2023 /АМИТ «Ховар»/. Бо мақсади иҷрои Барномаи «Пешгирии фарбеҳӣ ва ташаккули ғизои солим дар Ҷумҳурии Тоҷикистон барои солҳои 2019-2024» дар кафедраи кори ҳамширагӣ ва фанҳои клиникии Коллеҷи тиббии шаҳри Ҳисор  конференсияи илмӣ-назариявӣ баргузор гардид. Дар ин хусус ба хабарнигори минтақавии АМИТ «Ховар» Субҳониддини Маҳмуд дар коллеҷи тиббӣ иттилоъ доданд.

Дар  ҷамъомад омӯзгорону донишҷӯён иштирок намуда,  аз ҷониби шахсони масъул дар мавзуъҳои «Нуқсонҳои модарзодии дил дар кӯдакон», «Бемории инфаркти миокард дар байни ҷавонон», «Фарбеҳӣ ва пешгирии он», «Техникаи дурусти санҷидани фишор» ва «Бемории диабети қанд» маърузаҳо қироат шуданд.

Гуфта шуд, ки қариб дар 1% кӯдакони навзод нуқсонҳои модарзодии дил пайдо мешаванд. Аксари ҷавонони гирифтори бемории модарзодии дил ҳоло ба синни балоғат мерасанд. Дар аксари ҳолатҳо сабабҳо маълум нестанд. Баъзан сирояти вирусӣ дар модар боиси беморӣ мегардад. Беморӣ метавонад генетикӣ бошад. Баъзе нуқсонҳои модарзодии дил натиҷаи истеъмоли машрубот ё маводи мухаддир дар давраи ҳомиладорӣ мебошанд. Аксари нуқсонҳои дил ё сабаби гардиши ғайримуқаррарии хун тавассути дил мешаванд ё ба гардиши хун дар дил ё рагҳо монеъ мегарданд.

Як сӯрохӣ байни ду камераи дил намунаи як намуди хеле маъмули нуқсони модарзодии дил мебошад.

Дар фарҷоми конференсия байни донишҷӯёну маърузачиён саволу ҷавоб баргузор гардида, донишҷӯён ба саволҳои худ ҷавобҳои возеҳ гирифтанд.

АКС:  Коллеҷи тиббии шаҳри Ҳисор