«IJSO-2023». Хонандаи тоҷик дар ин олимпиадаи байналмилалӣ сазовори ҷойи 3-юм шуд

ДУШАНБЕ, 12.12.2023. /АМИТ «Ховар»/. Хонандаи синфи 10-и филиали Муассисаи таълимии хусусии «Литсей-интернати тоҷикӣ-русии Ҳотам ва ПВ» дар шаҳри Ҳисор Шаҳзода Раззоқова дар Олимпиадаи байналмилалии «IJSO-2023» сазовори ҷойи 3-юм гардид, иттилоъ медиҳад АМИТ «Ховар» бо истинод ба Муассисаи давлатии «Маркази ҷумҳуриявии дарёфт ва рушди истеъдодҳо»-и назди Вазорати маориф ва илми Ҷумҳурии Тоҷикистон.

Олимпиада аз 1 то 10 декабр дар шаҳри Бангкоки Шоҳигарии Тайланд бо иштироки 55 давлати дунё доир шуда, дар он дастаи Ҷумҳурии Тоҷикистонро 6 навраси то 15-сола муаррифӣ намуд.

Ёдовар мешавем, ки озмун дар се бахши фанҳои табиатшиносӣ — химия, биология ва физика доир гардида, дар он  мураккабтарин саволу масъалаҳо пешниҳоди довталабон шуданд.

АКС: Муассисаи давлатии «Маркази ҷумҳуриявии дарёфт ва рушди истеъдодҳо»-и назди Вазорати маориф ва илми Ҷумҳурии Тоҷикистон