«Стратегияи миллии ҳифзи гуногунии агробиологии Ҷумҳурии Тоҷикистон» таҳия мегардад

 ДУШАНБЕ, 20.12.2023 /АМИТ «Ховар»/. Дар шаҳри Душанбе ҷаласаи кории Гурӯҳи байниидоравӣ оид ба баррасии масъалаи таҳияи «Стратегияи миллии ҳифзи гуногунии агробиологии Ҷумҳурии Тоҷикистон» бо иштироки  намояндагони  вазорату идораҳои мамлакат  ва коршиносон доир гардид, хабар медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Дар ҷаласа доир ба  моҳият ва зарурати ҳифзи гуногунии агробиологӣ ва захираҳои генетикии растанӣ барои озуқаворӣ ва ғизо сухан гуфта шуд.

Таъкид гардид, ки «Стратегияи миллии ҳифзи гуногунии агробиологии Ҷумҳурии Тоҷикистон» ҳамчун ҳуҷҷати муҳими стратегӣ барои танзими ҳифзи захираҳои ирсӣ, генетикӣ ва гуногунии агробиологӣ ҷиҳати таъмини амнияти озуқаворӣ ва паст намудани сатҳи камбизоатӣ хеле зарур ва муҳим аст.

Иштирокдорони ҷаласа оид ба гуногунии агробиологӣ ва захираҳои генетикии Тоҷикистон, таҳдиду монеаҳои мавҷуда ва чорабиниҳои нақшавӣ ҷиҳати таҳияи Стратегия табодули назар намуданд.

Гуфта шуд, ки Тоҷикистон ҳамчун мамлакати кӯҳистон аз гуногунии биологӣ ва захираҳои генетикӣ бой буда, 70%-и аҳолии он аз захираҳои табиӣ ва ирсӣ вобаста мебошад. Аз ин рӯ маҳсулоти гуногунии агробиологӣ асоси амнияти озуқаворӣ ва таъмини устувори рӯзгори мардуми манотиқи кӯҳистон аст.

Иштирокдорони ҷаласа  аҳамияти таҳияи Стратегияи гуногунии агробиологиро бо назардошти тағйирёбии иқлим барои таъмини ҳифзи гуногунии агробиологӣ муҳим ва саривақтӣ арзёбӣ намуда,   дар самти такмили қонунгузорӣ доир ба гуногунии агробиологӣ, омӯзишҳо барои хоҷагидорон дар самти ҳифзи захираҳои генетикӣ, ташкили бонкҳои тухмӣ, омӯзиши занҷираи нархҳо барои ҳифзи зироати маҳаллӣ, кишоварзӣ ва рушди бозор пешниҳодҳо манзур намуданд.

Ҷаласа  аз тарафи Маркази миллии гуногунии биологӣ ва бехатарии биологии Кумитаи ҳифзи муҳити зисти назди Ҳукумати Ҷумҳурии Тоҷикистон дар ҳамкорӣ бо Ташкилоти озуқаворӣ ва кишоварзӣ (ФАО) дар доираи лоиҳаи «Ҳифзи гуногунии агробиологӣ барои устувории амнияти озуқаворӣ ва ғизо дар Тоҷикистон» гузаронида шуд.

   АКС: Кумитаи ҳифзи муҳити зисти назди Ҳукумати Ҷумҳурии Тоҷикистон