Воҳидҳои Кумитаи ҳолатҳои фавқулода ва мудофиаи гражданӣ соҳиби техникаҳои нав шуданд

ДУШАНБЕ, 27.12.2023 /АМИТ «Ховар»/. Бо мақсади беҳтар намудани пойгоҳи моддию техникии ҳамаи воҳидҳои Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон, ки дар ҳудуди ҷумҳурӣ фаъолият доранд, маросими ба ин кумита супоридани техникаи вазнин, техникаи махсус, воситаҳои шиноварӣ, телефонҳои моҳвораӣ, камераҳои наворбардорӣ, дастгоҳҳои аккосӣ, тахтаҳои электронӣ ва таҷҳизоти тиббӣ баргузор шуд. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи гражданӣ хабар медиҳад.

Ин дастгирӣ дар чаҳорчӯби ду лоиҳаи муштараки Кумита – «Лоиҳаи миллии Кумита ва Бонки Осиёии рушд оид ба идораи офатҳои табиӣ» ва «Беҳдошти омодагӣ ва устуворӣ ба офатҳои табиӣ дар Ҷумҳурии Тоҷикистон байни Кумита ва Бонки ҷаҳонӣ», инчунин шарики байналмилалӣ — Барномаи ҷаҳонии озуқаи Созмони Милали Муттаҳид дар Ҷумҳурии Тоҷикистон амалӣ гардид.

Ҳамаи ин таҷҳизот ва воситаҳои техникӣ барои анҷом додани корҳои саривақтии рафъи оқибатҳои офатҳои табиӣ, иҷрои корҳои наҷоти фаврӣ ва дигар корҳои таъхирнопазир, гузаронидани дарсҳо дар марказҳои таълимии кумита, инчунин ба даст овардани маълумоти саривақтӣ ва саҳеҳ оид ба вазъи табиат ва ҳодисаҳои эҳтимолии фавқулода пешбинӣ шудаанд.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон