Дар Осорхонаи миллӣ нуктаҳои асосии Паёми Президенти Тоҷикистон ба Маҷлиси Олӣ мавриди омӯзиш қарор гирифтанд

ДУШАНБЕ, 06.01.2024 /АМИТ «Ховар»/. Дар Осорхонаи миллии Тоҷикистон дар иртибот ба омӯзиши нуктаҳои асосии Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон таҳти унвони «Паёми Президенти Тоҷикистон–роҳнамои ояндасоз» ҳамоиш баргузор гардид, ки дар он роҳбарият ва ҳайати кормандони Осорхонаи миллӣ иштирок намуданд, хабар медиҳад АМИТ «Ховар» бо истинод ба Осорхонаи миллӣ.

Директори Осорхонаи миллӣ Зафаршо Иброҳимзода иброз дошт, ки Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ роҳнамои ояндасози миллати тоҷик мебошад, зеро дар он самтҳои рушди Тоҷикистон дар соҳаҳои иқтисодӣ, иҷтимоӣ, тандурустӣ, илму маориф, сайёҳӣ ва муносибатҳои байналмилалии Ҷумҳурии Тоҷикистон мавриди таҳлилу баррасии амиқ қарор гирифтаанд.

Ҳамзамон кормандони муассиса дар мавзуъҳои «Мақоми зан-модар дар Паёми Президенти Тоҷикистон», «Паёми Президенти Тоҷикистон- таҳкимбахши рушди ҷомеа», «Паёми Президенти Тоҷикистон- муттакои соҳаи маориф», «Рушди сайёҳӣ ва ҳунарҳои мардумӣ дар партави Паёми Президенти Тоҷикистон», «Ёдгориҳои таърихӣ–шиносномаи миллат дар партави Паёми Президенти Тоҷикистон» ва «Сиёсати давлатии ҷавонон дар Паёми Президенти Тоҷикистон» маъруза намуданд.

Иброз гардид, ки дар шароити ҷаҳонишавӣ бо мақсади ҳифзи арзишҳои миллӣ, таъриху фарҳанг ва забону адабиёти миллатамон барои ба ҷаҳониён ҳарчи бештар муаррифӣ намудани таърих, тамаддун ва фарҳанги халқи тоҷик аҳли фарҳанг бояд рисолати худро ҳамаҷониба ва дар сатҳи шоиста иҷро намоянд.

АКС: Осорхонаи миллии Тоҷикистон