Ояндаи наздик дар Бадахшон корхонаҳои истеҳсоли дору аз гиёҳҳои шифобахш, мебел ва масолеҳи сохтмонӣ сохта мешаванд

ДУШАНБЕ, 13.01.2024. /АМИТ «Ховар»/. Раиси Вилояти Мухтори Кӯҳистони Бадахшон Алишер Мирзонабот ва Котиби Шурои амнияти Ҷумҳурии Тоҷикистон Насрулло Маҳмудзода дар шаҳри Хоруғ бо фаъолияти корхонаҳои саноатӣ ва ҷараёни корҳои сохтмонии якчанд  иншооти таъйиноти иқтисодию иҷтимоӣ  шинос шуданд. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Хоруғ хабар доданд.

Зимни шиносоӣ бо фаъолияти корхонаҳои саноатӣ, ки дар доираи сафари кории Президенти Тоҷикистон муҳтарам Эмомалӣ Раҳмон соли 2023 ба шаҳри Хоруғ мавриди баҳрабардорӣ қарор гирифта буданд, ба роҳбарияти ин корхонаҳо ҷиҳати боз ҳам васеъ намудани истеҳсоли маҳсулоти ба содирот нигаронида тавсияҳои судманд дода шуд.

Дар заминаи Парки саноатии шаҳри Хоруғ лоиҳаи корхонаҳои нави саноатӣ, ки дар доираи сазовор пешвоз гирифтани ҷашни 35 ‐ солагии Истиқлолияти давлатии Ҷумҳурии Тоҷикистон аз ҷониби соҳибкорони ватанӣ бунёд мегарданд, муаррифӣ шуд.

Иттилоъ дода шуд, ки дар ин мавзеъ ояндаи наздик корхонаҳои истеҳсоли дору аз гиёҳҳои шифобахш, мебел, корхонаи равғанбарорӣ, коркарди гӯшт ва истеҳсоли ҳасиб, коркарди ширу маҳсулоти ширӣ ва масолеҳи сохтмонӣ сохта, ба истифода дода мешаванд.

АКС: Мақомоти иҷроияи ҳокимияти давлатии шаҳри Хоруғ