ҶОМИ ОСИЁ-2023. Дастаи мунтахаби Тоҷикистон барои бозӣ бо тими миллии Урдун омодагӣ мегирад

ДУШАНБЕ, 01.02.2024 /АМИТ «Ховар»/. Дастаи мунтахаби Тоҷикистон оид ба футбол ба бозии даври чорякниҳоии Ҷоми Осиё-2023 бо тими миллии Урдун омодагӣ мегирад, хабар медиҳад АМИТ «Ховар» бо истинод ба Федератсияи футболи Тоҷикистон.

Баъди як рӯзи истироҳат дастаи  яккачини Тоҷикистон дар Давҳа ба тамрин шуруъ намуд. Машқҳои даста дар маркази тамринии «Al Ersaal» баргузор шуданд.

Ҳамаи бозингароне, ки ба дастаи мунтахаби Тоҷикистон дохил ҳастанд, дар гурӯҳи умумӣ тамрин намуданд. Нимҳимоятгар Амадонӣ Камолов ба далели корти сурхе, ки дар бозӣ бо дастаи мунтахаби Қатар гирифта буд, аз ҳаққи ширкат дар 3 вохӯрӣ маҳрум аст ва дар бозӣ ба муқобили тими Урдун ба майдон намебарояд.

ҶОМИ ОСИЁ-2023

Чорякниҳоӣ

2 феврал (ҷумъа)

Оғоз – соати 16:30 бо вақти Душанбе

ТОҶИКИСТОН – Урдун

Давҳа, варзишгоҳи Аҳмад бин Алӣ

АКС: Федератсияи футболи Тоҷикистон