Дар Душанбе раванди татбиқи Барномаи рушди низоми агроозуқаворӣ баррасӣ гардид

ДУШАНБЕ, 15.03.2024. /АМИТ «Ховар»/. Дар шаҳри Душанбе бо ташаббуси Вазорати кишоварзии Ҷумҳурии Тоҷикистон оид ба «Барномаи рушди низоми агроозуқаворӣ ва кишоварзии устувор барои давраи то соли 2030: Баррасии раванди татбиқ ва нақшаҳои минбаъда» ҳамоиш баргузор гардид, ки дар он механизмҳои ҷалби васеи доираҳои илмӣ ба раванди татбиқи ин барнома мавриди муҳокима шуданд. Дар ин хусус ба АМИТ «Ховар» дар маркази матбуот ва иттилооти Вазорати кишоварзии Ҷумҳурии Тоҷикистон хабар доданд.

Дар ҳамоиш таъкид гардид, ки «Барномаи рушди низоми агроозуқаворӣ ва кишоварзии устувор барои давраи то соли 2030» бо Қарори Ҳукумати Ҷумҳурии Тоҷикистон аз 1 марти соли 2023 қабул гардида, имрӯз мавриди амал қарор дорад.

Ҳадаф аз баргузории ҳамоиш -ин баррасии ҷараёни амалишавӣ ва муайян намудани механизми мониторинг ва арзёбии барнома бо ҷалби тамоми ҷонибҳои манфиатдор, аз ҷумла шарикони рушд дар раванди татбиқи он мебошад.

Зимни ҳамоиш  инчунин механизмҳои ҷалби васеи доираҳои илмӣ ба раванди татбиқи барнома, аз ҷумла омода намудани маводи таҳлилӣ оид ба афзалияти стратегии барнома, таҳияи пешниҳоду тавсияҳо барои такмил додани механизми баррасии ҷараёни иҷро бо назардошти афзалияти стратегӣ, инчунин вазифаҳои алоҳидаи ҳамаи дигар барномаҳои соҳавие, ки дар бахши кишоварзии мамлакат амалӣ мешаванд, баррасӣ шуданд.

АКС: Маркази матбуот ва иттилооти Вазорати кишоварзии Ҷумҳурии Тоҷикистон