Дар Кумитаи телевизион ва радио ҷашни байналмилалии Наврӯз бо риояи расму оинҳои хосса таҷлил гардид

ДУШАНБЕ, 28.03.2024. /АМИТ «Ховар»/. Ҷашни Наврӯзи байналмилалӣ дар Кумитаи телевизион ва радиои назди Ҳукумати Ҷумҳурии Тоҷикистон таҷлил карда шуд, иттилоъ медиҳад АМИТ «Ховар» бо истинод ба Кумитаи телевизион ва радио.

Дар ҳамоиши наврӯзӣ роҳбарияти кумита, масъулон, доираи васеи кормандони шабакаҳои телевизионию радиоӣ ва дигар зерсохтор иштирок намуданд.

Роҳбарияти кумита бо хони наврӯзӣ, ҳафтшину ҳафтсин, намоиши ҳунарҳои мардумӣ, гулдӯзӣ, маҳсулоти нонию қаннодӣ ва дигар дастовардҳо шинос шуда, ҳозиринро бо ҷашни байналмилалии Наврӯз табрику таҳният гуфт.

Иброз гардид, ки имрӯзҳо тантанаҳои ҷашни Наврӯзи бостон дар ҳама шаҳру ноҳияҳои мамлакат бо шукуҳу шаҳомати хосса идома дошта, сокинони сарбаланди диёри азизамон бо шукргузорӣ аз сулҳу суботи комил, ойини милливу мардумӣ ва ифтихор аз ватану ватандорӣ соли нави аҷдодиамон — Наврӯзи оламафрӯзро бо хурсандиву хушҳолии зиёд таҷлил менамоянд.

Таъкид шуд, ки Наврӯз, пеш аз ҳама, ҷашни мардумӣ ва ҷузъи зиндагиву ҷаҳонбинии халқи тоҷик ба ҳисоб меравад. Ниёгони мо ҳанӯз аз замонҳои бисёр қадим рӯзи аввали солшумории шамсиро рӯзи нахустини баҳор, бедоршавии табиат, оғози киштукор ва такмилу танзими олам медонистанд.

Дар ҳамоиши наврӯзӣ ба кормандони кумита ва зерсохторҳои он, ки фаъолияти намунавию самарабахш нишон додаанд, нишони «Аълочии телевизион ва радиои Тоҷикистон», «Ифтихорнома», «Сипоснома»-и Кумитаи телевизион ва радио, «Аълочии фарҳанги Ҷумҳурии Тоҷикистон» ва дигар мукофот тақдим гардид.

АКС: Кумитаи телевизион ва радиои назди Ҳукумати Ҷумҳурии Тоҷикистон