ФУТБОЛ. Имрӯз дастаи олимпии Тоҷикистон (U-23) дар Душанбе бо дастаи мунтахаби Ветнам бозӣ менамояд

ДУШАНБЕ, 20.03.2024 /АМИТ «Ховар»/. Имрӯз, 20 март дар шаҳри Душанбе бозии якуми дӯстона байни дастаҳои олимпии Тоҷикистон ва Ветнам баргузор мешавад, хабар медиҳад АМИТ «Ховар» бо истинод ба Федератсияи футболи Тоҷикистон.

Бозӣ дар Варзишгоҳи марказии ҷумҳуриявии шаҳри Душанбе соати 20:00 оғоз мешавад. Даромад ба варзишгоҳ ройгон аст.

Бояд гуфт, ки дастаи олимпии Тоҷикистон (U-23) оид ба футбол дар Душанбе омодагиро ба қисми ниҳоии Ҷоми Осиё-2024, ки аз 15 апрел то 3 май дар Қатар баргузор мешавад, оғоз намудааст.

Дастаи мунтахаби олимпии Тоҷикистон (U-23) бо ҳамсолонаш аз Ветнам ду бозии дӯстона анҷом медиҳад. Ин вохӯриҳо  20 март  ва 23 март дар Варзишгоҳи марказии Душанбе баргузор мешаванд.

Дар Ҷоми Осиё-2024 байни дастаҳои то 23-сола дастаи Тоҷикистон дар гурӯҳи «С» бо дастаҳои мунтахаби Арабистони Саудӣ (16 апрел), Ироқ (19 апрел) ва Тайиланд (22 апрел) неру месанҷад.

АКС: Федератсияи футболи Тоҷикистон