ДАРАХТ БИНШОН! Дар шафати шоҳроҳи Ваҳдат-Норак беш аз 1500 бех ниҳоли дарахти санавбар шинонида шуд

ДУШАНБЕ, 03.04.2024 /АМИТ «Ховар»/. Дар шафати шоҳроҳи Ваҳдат-Норак беш аз 1500 бех ниҳоли дарахти санавбар шинонида шуд, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Дар ҳашари ниҳолшинонӣ Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода, роҳбарият ва дигар сохторҳои Мақомоти иҷроияи ҳокимияти давлатии шаҳри Ваҳдат, аз ҷумла 11 ҷамоати шаҳраку деҳоти шаҳр, шуъбаи ҳифзи муҳити зист дар шаҳри Ваҳдат ва кормандони ҶДММ «Покруд» иштирок намуданд.

Ҳашари ниҳолшинонӣ бо мақсади татбиқи сиёсати экологӣ, таъмини рушди иқтисоди «сабз», мутобиқшавӣ ба тағйирёбии иқлим, коҳиш додани газҳои гулхонаӣ ва таъмини саросарии амнияти экологии аҳолӣ гузаронида шуд.

Ниҳолҳо аз тарафи Кумитаи ҳифзи муҳити зист ва ҶДММ «Покруд» дастрас гардида, бо риояи қоидаҳои агротехникӣ шинонида шуданд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон