Дастаи «Истиқлол»-и Душанбе маротибаи 12-ум Суперҷоми Тоҷикистонро соҳиб гардид

ДУШАНБЕ, 13.05.2024 /АМИТ «Ховар»/. Дастаи футболи «Истиқлол»-и шаҳри Душанбе ба шарофати голҳои Рустам Соиров ва Элеке Чибуеке Блессинг бар дастаи футболи «Равшан»-и шаҳри Кӯлоб пирӯз шуда, барандаи Суперҷоми Тоҷикистон-2024 гардид. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Бозӣ барои Суперҷоми Тоҷикистон-2024 дар варзишгоҳи таъмиршудаи «ТАЛКО Арена»-и шаҳри Турсунзода байни дастаҳои футболи «Истиқлол»-и шаҳри Душанбе ва «Равшан»-и шаҳри Кӯлоб баргузор шуда, бо ҳисоби 2:1 ба фоидаи дастаи «Истиқлол»-и шаҳри Душанбе анҷом ёфт.

Ҳамин тариқ, дастаи футболи «Истиқлол»-и шаҳри Душанбе маротибаи дувоздаҳум дар таърихаш барандаи Суперҷоми Тоҷикистон шуд. Қаблан дастаи футболи «Истиқлол»-и шаҳри Душанбе солҳои 2010, 2011, 2012, 2014, 2015, 2016, 2018, 2019, 2020, 2021 ва 2022 соҳиби Ҷом гардида буд.

АКС: Федератсияи футболи Тоҷикистон