Собиқадорони Вазорати корҳои дохилӣ дар Чемпионати Аврупо оид ба ҷудо сазовори медали тилло гардиданд

ДУШАНБЕ, 14.05.2024 /АМИТ «Ховар»/. 11-12 май дар шаҳри Тифлис — пойтахти Гурҷистон Чемпионати Аврупо оид ба ҷудо байни собиқадорон баргузор гардид, ки дар он 2 намояндаи Тоҷикистон сазовори ҷойи аввал ва медали тилло гардиданд. Дар ин хусус ба АМИТ «Ховар» дар Шурои собиқадорони Вазорати корҳои дохилӣ хабар доданд.

Дар мусобиқа собиқадорон аз кишварҳои гуногуни ҷаҳон иштирок намуданд. Аз ҷумла, аз Тоҷикистон дар ин мусобиқаи сатҳи баланд 4 собиқадори Вазорати корҳои дохилии Ҷумҳурии Тоҷикистон иштирок намуд.

Намояндагони Тоҷикистон: генерал — майори мустаъфии милитсия, чемпиони ҷудои Тоҷикистон ва арсаи байналмилалӣ Ҳабибулло Маҷидов ва полковники мустаъфии хизмати дохилӣ, чемпиони ҷудои ҷаҳон Хайрулло Назриев тавонистанд ҳар яке дар вазни худ дар ҳама ҳарбҳо ва давраҳо ба рақибонашон ғолиб омада, соҳиби ҷойҳои аввал ва медали тилло гарданд.

Чемпионҳои ҷудои тоҷик шарафи варзиши тоҷикро далерона дифоъ намуданд. Ба шарафи онҳо Парчами давлатӣ барафрохта ва Суруди миллии Тоҷикистон садо дод.

АКС: Шурои собиқадорони Вазорати корҳои дохилии Ҷумҳурии Тоҷикистон