Институтҳои молиявии ҷаҳонӣ ҳамкории самаранокро бо Тоҷикистон идома медиҳанд

ДУШАНБЕ, 01.07.2024 /АМИТ «Ховар»/. 1 июл Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ноиби Президенти Бонки умумиҷаҳонӣ Антонелла Бассани ва ноиби Президенти Корпоратсияи Байналмилалии Молиявӣ Хела Шейхроухуро ба ҳузур пазируфтанд.

Пас аз мулоқот бо иштироки ноиби Президенти Бонки умумиҷаҳонӣ Антонелла Бассани ва ноиби Президенти Корпоратсияи Байналмилалии Молиявӣ Хела Шейхроуху нишасти матбуотӣ доир гардид.

«Ман хеле шодам, ки дар Тоҷикистон ҳастам ва ин сафари дуюми ман  ба ҳайси ноиби Президенти Бонки умумиҷаҳонӣ аст. Ман аз зебоии мамлакат, фарҳанг ва меҳмоннавозии аҷиби мардуми он хеле хушҳол шудам. Дар мулоқот бо Президенти Ҷумҳурии Тоҷкистон муҳтарам Эмомалӣ Раҳмон вазъи шарикӣ ва ҳамкории дуҷонибаи Тоҷикистон ва Бонки умумиҷаҳониро баррасӣ намудем», — гуфт Антонелла Бассани.

Таъкид гардид, ки ҳоло дар Тоҷикистон тақрибан 25 лоиҳа ба маблағи 1,7 миллиард доллари амрикоӣ дар доираи Ассотсиатсияи байналмилалии рушд амалӣ шуда, онҳо рушди сармоягузорӣ, татбиқи ислоҳоти сиёсӣ ва инчунин бахшҳои энергетика, об, кишоварзӣ, маориф, тандурустӣ, идораи захираҳои табиӣ ва ғайраро фаро мегиранд.

«Дар мулоқот инчунин самтҳои ояндадор, ки метавонанд боиси амиқтар ва густариш ёфтани ҳамкорӣ гарданд, баррасӣ шуданд. Мо дар соҳаи таъмини оби нушокӣ ба хулоса омадем, ки дар ин самт чораҳои минбаъдаро ҷонок карда, хамкориро беҳтар намоем», — иттилооъ дод ноиби Президенти Бонки умумиҷаҳонӣ.

Ӯ тазаккур дод, ки дар мулоқот бо Президенти Ҷумҳурии Тоҷикистон фаъолияти Ҳукумати мамлакатро дар пешрафти ислоҳот ситоиш намуд.

Ноиби Президенти Корпоратсияи Байналмилалии Молиявӣ Хела Шейхроуху, дар навбати худ, изҳор дошт, ки дар мулоқот бо Президенти Ҷумҳурии Тоҷикистон муҳтарам Эмомалӣ Раҳмон роҳи дар оянда осонтар намудани соҳибкорӣ барои ҷавонон ва занон баррасӣ шуд.

«Ҳайати Корпоратсияи Байналмилалии Молиявӣ тасмим гирифтааст дониш ва таҷрибаи ҷаҳониро дар бахши хусусӣ амалӣ намояд, ки он метавонад ҳамчун манбаи ҷойҳои кории босифат ва рушди иқтисодиёт дар Тоҷикистон гардад», — гуфт ӯ.

Иттилоъ дода шуд ки ҷониби  Корпоратсияи Байналмилалии Молиявӣ бесаброна интизори ҳамкорӣ дар доираи харитаи роҳ барои коҳиш додани монеаҳо дар роҳи соҳибкорӣ ва фароҳам овардани имконият барои ҷавонон, занон ва духтарон ҷиҳати эҷоди корхонаҳои муваффақ дар бахшҳои мухталифи иқтисоди Тоҷикистон мебошад.

«Дар минтақа Корпоратсияи Байналмилалии Молиявӣ, ки 21 кишварро фаро мегирад, чандин миллиард доллар сармаоягузорӣ мешавад. Барои Тоҷикистон дар 12 моҳи охир 60 миллион доллари амрикоӣ равон шудааст ва азм дорем онро дар онянаи наздик зиёд намоем», — таъкид намуд Хела Шейхроуху.

Дар анҷом ноиби Президенти Бонки умумиҷаҳонӣ Антонелла Бассани ва ноиби Президенти Корпоратсияи Байналмилалии Молиявӣ Хела Шейхроуху иброз намуданд, ки онҳо бесаброна интизори ҳамкории самаранок ба нафъи мардум мардуми Тоҷикистон мебошанд.

АКС: АМИТ «Ховар»