НИШАСТИ МАТБУОТӢ. Суръати афзоиши Маҷмуи маҳсулоти дохилӣ дар Тоҷикистон ба 8,2 фоиз баробар гардид

ДУШАНБЕ, 09.08.2024 /АМИТ «Ховар»/. Ҳаҷми Маҷмуи маҳсулоти дохилӣ имсол дар мамлакат ба 61 миллиарду 712,5 миллион сомонӣ ва суръати афзоиши он ба 8,2 фоиз баробар гардид. Дар ин хусус муовини аввали Вазири молияи Ҷумҳурии Тоҷикистон Юсуф Маҷидӣ 9 август дар ҷараёни нишасти матбуотӣ ба намояндагони расонаҳои хабарии ватанию хориҷӣ зимни натиҷагирӣ аз фаъолияти Вазорати молияи мамлакат дар шашмоҳаи аввали имсол иттилоъ дод.

Юсуф Маҷидӣ афзуд, ки рушди иқтисодиёти мамлакат дар ин давра аз ҳисоби истеҳсоли маҳсулоти саноатӣ 11,5 фоиз, гардиши бор- 12,5 фоиз, мусофиркашонӣ- 18,1 фоиз, кишоварзӣ- 9,6 фоиз, сохтмон- 15,7 фоиз, гардиши савдо- 11,9 фоиз ва хизматраоснии пулакӣ дар маҷмуъ 16,6 фоизро ташкил дод.

Дар ин давра ҳаҷми гардиши савдои хориҷӣ ба 4 миллиарду 414,3 миллион доллари амрикоӣ баробар гардид. Аз Тоҷикистон ба маблағи 997,8 миллион доллари амрикоӣ молу маҳсулот содирот ва ба маблағи 3 миллиарду 416,5 миллион доллари амрикоӣ молу маҳсулот ворид гардидааст.

Марзия САИДЗОДА,
АМИТ «Ховар»

АКС: АМИТ «Ховар»