Омӯзгори фанни таълими меҳнат аз Рашт Зубдахон Валиева: «Ҳунарамро дар мактаб ба шогирдон ва дар хона ба занон меомӯзонам»
ДУШАНБЕ, 14.09.2024. /АМИТ «Ховар»/. Омӯзгори фанни таълими меҳнати Муассисаи таҳсилоти миёнаи умумии №25-и ноҳияи Рашт Зубдахон Валиева 15 сол мешавад, ки ҳунарҳои миллӣ, хусусан қуроқдӯзиро дар мактаб ба шогирдон ва дар хона ба занони хонанишин меомӯзонад.
Ин омӯзгори ҳунарманд дар Муассисаи давлатии «Литсейи касбии техникии ноҳияи Рашт» таҳсил намуда, ҳунари қуроқдӯзиро аз модараш омӯхтааст. Имрӯз аз ҳунари омӯхтааш ҳам оиларо таъмин мекунад ва ҳам байни занони ноҳия ҳамчун зани фаъолу ҳунарманди шинохта соҳиби иззату эҳтиром аст.
«Ман хурсандам, ки шогирдони ман ҳунари қуроқдӯзиро нағз аз худ менамоянд. Ҳангоми ба шавҳар баромадан аз уҳдаи дӯхтани чодар, кӯрпа, кӯрпача ва болишт ба хубӣ баромада, ҳамзамон фармоиш қабул мекунанд»,-гуфт Зубдахон Валиева.
Ба андешаи ин зани ҳунарманд, назокату нафосати кори ҳунармандони асил сирри ниҳони худро дорад ва маҳсули дасти ҳар як ҳунарманд яке аз дигаре беҳтар буда, диққати бинандаро ҷалб менамояд.
Аслан калимаҳои «қуроқ» ё «қуроқдӯзӣ» маънои порчаҳои матоъро ба ҳам пайваст карда, нақш офариданро доранд. Ба воситаи ин ҳунар дастархон, чодари арӯсӣ, кӯрпаву кӯрпача, болиштпӯш ва чойнакпӯш медӯзанд.
«Санъати қуроқдӯзӣ- ин дӯхтани маснуоти мухталифи хонагӣ бо тариқи дӯхтан ё пайваст кардани порчаҳо ё боқимондаҳои матоъ ба ҳамдигар мебошад. Дар замони гузашта ин тарзи дӯхтани матоъ дар байни халқҳои мухталифи дунё ривоҷ ёфта буд. Дар замони муосир занони ҳунарманд ин касбро ба сатҳи волои ҳунарӣ расонидаанд. Мо, занони тоҷик имрӯз аз ин навъи ҳунари мардумӣ ба таври васеъ истифода мебарем»,-афзуд Зубдахон Валиева.
Тавре ҳамсуҳбати мо мегӯяд, дар ҳар маснуоти қуроқдӯзӣ на фақат ҷиҳати эстетикӣ, балки хусусияти хоси маҳаллии он низ зоҳир мегардад. Дар қуроқдӯзӣ манзараҳои табиат, хусусияти таҳҷоӣ ва нақшҳои геометрӣ тасвир меёбанд. Ба василаи қуроқдӯзӣ нақшҳои қадимӣ ва рамзу нишонаҳое, ки дар эҷодиёти мардум истифода шудаанд, зинда мегарданд.
Зубдахон Валиева давоми 15 соли фаъолияти омӯзгорӣ ва ҳунарӣ имсол аввалин маротиба соҳиби гранти президентӣ гардид. Ӯ аз он хурсанд аст, ки ба воситаи гранти президентӣ, ки маблағи бебозгашт аст, метавонад фаъолияташро рушд диҳад.
«Ман мехоҳам, ки бо маблағи гранти президентӣ таҷҳизоти нав харида, сафи занони ҳунармандро дар ноҳия зиёд намоям», — иброз дошт Зубдахон Валиева.
Моҳинави НАВРӮЗ,
АМИТ «Ховар»
АКС: АМИТ «Ховар»
«НАВРӮЗ — ИДИ ЗАНОНИ ВАҲДАТСАРО». Дар шаҳри Хуҷанд Форуми байналмилалии занон баргузор мегардад
Дар шаҳри Турсунзода Маркази саломатии деҳавии «Саркор» ба истифода дода шуд
Эмомалӣ Раҳмон: «Яке аз бузургтарин ҳикмати моҳи шарифи Рамазон ва иди саиди Фитр расидан ба қадри неъматҳо мебошад»
ОГОҲӢ. Хатари лағзиши тарма ва омадани сел дар роҳҳои кӯҳии Тоҷикистон то 31 март боқӣ мемонад
Барои пешгирии амалҳои коррупсионӣ бо кормандони соҳаи тандурустии шаҳри Роғун вохӯрӣ доир гардид
МАСЛИҲАТИ МУТАХАССИС. Барои пешгирии аллергия тарзи ҳаёти солимро бояд интихоб намуд
Табибони Тоҷикистону Чин ҳамкории илмию таълимиро тақвият мебахшанд
Дар ноҳияи Шамсиддини Шоҳин шуъбаи эндовидеоҷарроҳӣ ба истифода дода шуд
Аз 24 то 27 март дар Тоҷикистон ҳавои тағйирёбанда пешгӯӣ шуда, борон меборад
МАСЛИҲАТИ МУТАХАССИС. Сиёҳалафро барои муолиҷаи бемориҳои рӯда ва захми меъда истифода мебаранд
ТАШАББУСИ ШОИСТАИ ИНСОНДӮСТОНАИ ПЕШВОИ МИЛЛАТ. Андешаҳо дар ҳошияи Фармони Президенти Ҷумҳурии Тоҷикистон «Дар бораи бахшиши ҷазои шахсоне, ки ба маҳрум сохтан аз озодӣ маҳкум карда шудаанд»
Имрӯз дар асоси Фармони Президенти Тоҷикистон боз 697 нафар маҳбусон аз муассисаҳои ислоҳии ҷумҳурӣ озод карда шуданд
