Бахшида ба Рӯзи забони давлатӣ дар Маҷлиси намояндагон ҳамоиши идона доир гардид

ДУШАНБЕ, 04.10.2024 /АМИТ «Ховар»/. Имрӯз бахшида ба Рӯзи забони давлатӣ таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода дар мавзуи «Забони миллат-ҳастии миллат» ҳамоиши тантанавӣ баргузор гардид. Дар ин хусус АМИТ «Ховар» бо истинод ба Маҷлиси намояндагони Маҷлиси Олии Ҷумҳурии Тоҷикистон хабар медиҳад.

Маҳмадтоир Зокирзода иброз намуд, ки таҷлили ин санаи таърихӣ ба қабули Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» аз 5 октябри соли 2009 иртибот дорад.

«Ҳукумати Ҷумҳурии Тоҷикистон таҳти сарварии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳанӯз аз оғози истиқлолият барои рушди забони миллӣ ва таҳкими мақоми давлатии он пайваста тадбирҳои муассир андешида, барои пешбурди ин самти сиёсати миллӣ тамоми заминаҳоро фароҳам овардааст»,-баён дошт ӯ.

Арҷгузорӣ ба забони давлатӣ, ки ҳамчун рукни муҳимтарини ҳастии миллат, пойдевори асосии давлатдорӣ ва фарҳангу маънавиёти мардум нақши барҷаста дорад, вазифаи инсониву виҷдонии ҳар фард ба ҳисоб меравад.

Вакилони Маҷлиси намояндагон таъкид доштанд, ки мо бояд дар баробари аҳли илму адаб парчамбардори забону фарҳанги миллати худ бошем, барои рушду таҳкими бештари забони модарӣ аз тамоми имконот истифода кунем ва ҳифзу густариши онро дар сатҳи давлатӣ таъмин намоем. Барои расидан ба ин ҳадаф бояд дар қадами аввал ба татбиқи пурраи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» мусоидат намоем.

АКС: Маҷлиси намояндагони Маҷлиси Олии Ҷумҳурии Тоҷикистон