Дар Бонки миллии Тоҷикистон ба ифтихори 30-солагии Конститутсия ҷамъомади тантанавӣ доир гардид

ДУШАНБЕ, 05.11.2024 /АМИТ «Ховар»/. 6 ноябри соли 1994 дар таърихи давлатдории Тоҷикистон бо ташаббуси Президенти Ҷумҳурии Тоҷикистон муҳтарам Эмомалӣ Раҳмон бо роҳи раъйпурсии умумихалқӣ Конститутсия қабул гардид, ки истиқлоли давлати тоҷиконро ба расмият дароварда, асосҳои сиёсию ҳуқуқӣ ва самтҳои асосии таҳкиму пешрафти ояндаи мамлакатро мутобиқи меъёрҳои эътирофшудаи байналмилалӣ муайян намуд. Ин нуктаро Раиси Бонки миллии Тоҷикистон Фирдавс Толибзода дар ҷамъомади тантанавӣ ба ифтихори 30-солагии Конститутсияи Ҷумҳурии Тоҷикистон иброз намуд. Дар ин хусус АМИТ «Ховар» бо истинод ба Бонки миллии Тоҷикистон иттилоъ медиҳад.

Дар ҷаласа иброз гардид, ки қабули Конститутсия майлу иродаи шаҳрвандон барои таъмини кафолати ҳуқуқу озодиҳо ва бунёди устувори рушду такомули давлати соҳибистиқлоли Тоҷикистон буд. Конститутсияи Ҷумҳурии Тоҷикистон ҳамчун ҳуҷҷати

муҳимми сиёсӣ дастоварди беназири даврони истиқлол буда, дар ташаккули асосҳои сохтори давлатӣ, таҳкиму инкишофи қонунгузории миллӣ ва мустаҳкам гардонидани пояҳои устувори истиқлолияти комили сиёсии марҳилаи нави рушди Тоҷикистон ҳамчун давлати соҳибистиқлол нақши бузург дорад. Конститутсия ба таъмини сулҳу субот ва ваҳдати миллӣ мусоидат намуда, омили асосии кафолати пойдории ҳаёти сиёсии ҷомеаи Тоҷикистон гардидааст.

Дар Конститутсияи Ҷумҳурии Тоҷикистон эътироф шудани забони тоҷикӣ ба ҳайси забони давлатӣ имкон дод, ки арзишҳои миллию фарҳангии миллати тоҷик арҷгузорӣ шуда, барои худшиносию худогоҳии миллӣ ва рушди забони тоҷикӣ ба сифати рукни муҳимми давлатдории миллӣ шароити мусоид фароҳам оварда шавад.

Тағйиру иловаҳо ба Конститутсия мақому манзалати инсон ва шаҳрвандро дар ҷомеа муайян намуда, аҳолии мамлакатро ба ободкорию созандагӣ, арҷ гузоштан ба арзишҳои фарҳангӣ ва муқаддасоти миллӣ, ҳифзи якпорчагӣ ва амнияти ҷомеа, пойдориву таҳкими Ваҳдати миллӣ ва расидан ба қадри Истиқлолияти давлатӣ ҳидоят менамояд.

АКС: Бонки миллии Тоҷикистон