Сафири Тоҷикистон бо Вазири иқтисоди Амороти Муттаҳидаи Араб мулоқот намуд

ДУШАНБЕ, 22.11.2024 /АМИТ «Ховар»/. 21 ноябр дар шаҳри Дубай мулоқоти Сафири Фавқулода ва Мухтори Ҷумҳурии Тоҷикистон дар Амороти Муттаҳидаи Араб Ашрафҷон Гулов бо Вазири иқтисод, ҳамзамон Раиси Мақомоти федералии авиатсияи граждании Амороти Муттаҳидаи Араб Абдуллоҳ ибни Тавқ Ал-Маррӣ баргузор гардид.

Тавре АМИТ «Ховар» бо истинод ба Сафорати Ҷумҳурии Тоҷикистон дар Амороти Муттаҳидаи Араб хабар медиҳад, дар мулоқот ҷонибҳо таҳкими бештари ҳамкорӣ байни Тоҷикистон ва Аморотро дар бахшҳои гуногуни иқтисодию иҷтимоӣ зарур шуморида, ҳавасмандии худро ҷиҳати афзоиши ҳаҷми табодули тиҷоратӣ миёни ҳар ду мамлакат иброз доштанд.

Дар ин замина ҷонибҳо оид ба ба масъалаҳои мубрам, аз ҷумла аҳамияти таҳияи «Харитаи роҳи ҳамкорӣ», татбиқи лоиҳаҳои иқтисодӣ, ҷалби сармоя, ташкили форумҳои муштараки соҳибкорӣ, воридот ва содироти молу маҳсулот, ҳамоҳангсозии иштироки ҳайатҳои расмӣ дар чорабиниҳои соҳавии байналмилалӣ, рушди сайёҳӣ, инчунин пешбурди шарикӣ дар соҳаи авиатсия табодули назар карданд.

АКС: Сафорати Ҷумҳурии Тоҷикистон дар Амороти Муттаҳидаи Араб