ҲАРАКАТИ ҶУМҲУРИЯВИИ НИҲОЛШИНОНӢ. Дар ноҳияи Бобоҷон Ғафуров 44 ҳазор бех дарахтони сояафкан, ҳамешасабз ва ороишию мевадиҳанда шинонида мешаванд

ДУШАНБЕ, 25.01.2025 /АМИТ «Ховар»/. Имсол дар ноҳияи Бобоҷон Ғафуров 44 ҳазор бех дарахтони сояафкан, ҳамешасабз ва ороишию мевадиҳанда шинонида мешаванд. Дар ин хусус ба АМИТ «Ховар» дар хадамоти матбуоти Раиси вилояти Суғд хабар доданд.

Дар айни замон бо иштироки кормандони шуъбаи ҳифзи муҳити зист дар ноҳия ва сокинони ҷамоати Ғозиён дар шоҳроҳи Душанбе — Чанок беш аз 200 бех ниҳолҳои ҳамешасабзу ороишӣ шинонида шуданд.

Барои беҳдошти муҳити зист, аз ҷумла шинонидани ниҳолҳо ва сабзазоркунӣ дар дигар ҷамоату мавзеъҳои ноҳия ҳашарҳо пешбинӣ гардидаанд.

Сокинони ноҳияи Бобоҷон Ғафуров иқдом гирифтаанд, ки дар мавсими имсолаи ниҳолшинонӣ фаъолона иштирок намуда, дар ободонию хуррамгардонии шаҳр саҳми арзанда гузоранд.

Ин иқдом дар асоси иҷрои қарори Ҳукумати Ҷумҳурии Тоҷикистон дар бораи «Барномаи давлатии кабудизоркунии Ҷумҳурии Тоҷикистон барои давраи то соли 2040» дар вилоят идома дорад.

АКС: Хадамоти матбуоти Раиси вилояти Суғд