Дар ноҳияи Мастчоҳ доир ба тавзеҳи Паёми Президенти Тоҷикистон ба Маҷлиси Олӣ ҳамоиш доир шуд

ДУШАНБЕ, 19.01.2025 /АМИТ «Ховар»/. Дар ноҳияи Мастчоҳ оид ба шарҳу тавзеҳи нуктаҳои асосии Паёми Президенти Ҷумҳурии  Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ҳамоиш баргузор гардид. Дар ин хусус АМИТ «Ховар» бо истинод ба дафтари матбуоти Раиси ноҳияи Мастчоҳ хабар медиҳад.

Паёми Президенти Тоҷикистон ба Маҷлиси Олӣ  муҳимтарин ҳуҷҷат барои рушди ҷумҳурӣ ва таъмини субот дар ҷомеа арзёбӣ гардида, таъкид шуд, ки ин санад барои ҳар шаҳрванди мамлакат зарурати ҳамоҳангӣ ва ҳамкории мақомоти давлатиро бо мардум барои иҷрои нақшаҳои давлатӣ ва беҳбуди вазъи иқтисодӣ ва иҷтимоии мамлакат тақозо мекунад.

Ҳозирин даъват шуданд, ки ба ислоҳи камбудиҳо, иҷрои қонунҳо ва иштироки фаъолона дар татбиқи барномаҳои давлатӣ диққати аввалиндараҷа дода, бо пайгирии ҷиддии Паёми Президенти Ҷумҳурии Тоҷикистон ба Маҷлиси Олӣ ва амалишавии дастуру супоришҳои Роҳбари давлат дар рушди иқтисод, тартиботи ҷамъиятӣ ва устувории амният саҳм гузоранд.

Дар ҳамоиш паҳлуҳои иқтисодӣ, иҷтимоӣ, сиёсӣ ва фарҳангии Паёми Президенти Ҷумҳурии Тоҷикистон ба Маҷлиси Олӣ аз ҷониби масъулини мақомоти ноҳия мавриди омӯзиш қарор дода шуд.

Судяи Суди ноҳияи Мастчоҳ Муҳсин Убайдзода дар бораи аҳамияти адолат ва нақши суд дар иҷрои қарору ҳукмҳо баромад намуда, сокинони ноҳияро даъват намуд, ки дар ҳама ҳолат ба қонун ва равандҳои ҳуқуқӣ эҳтиром гузоранд. Мавсуф ҳамчунин изҳор дошт, ки таъмини забономӯзии хонандагон ва кумак ба таҳсил дар муассисаҳои таълимӣ дар ноҳия бояд аз диққати волидайн дур набошад.

Гуфта шуд, ки Паёми Президенти Ҷумҳурии Тоҷикистон муҳтарам Эмомалӣ Раҳмонро ҳамасола тамоми сокинон- намояндагони касбу кори гуногун бесаброна интизор мешаванд. Зеро Паёми Президенти Ҷумҳурии Тоҷикистон ба Маҷлиси Олӣ сарчашмаи боэътимод, махзани иттилоот ва маълумоти омории амиқу дақиқ, таҳлилу хулосарониҳои мантиқию бебаҳс ва дастуру супоришҳои ҳидояткунанда ба сӯи ояндаи дурахшон мебошад.

АКС: Дафтари матбуоти Раиси ноҳияи Мастчоҳ