35-СОЛАГИИ ИСТИҚЛОЛИ ДАВЛАТӢ. Дар шаҳри Истаравшан маҷмааи «Шоҳроҳи абрешим» ба истифода дода мешавад

ДУШАНБЕ, 08.02.2025 /АМИТ «Ховар»/. Бахшида ба ҷашни 35-солагии Истиқлоли давлатӣ  дар шаҳри Истаравшан маҷмааи бисёрсоҳаи «Шоҳроҳи абрешим» мавриди  истифода қарор дода мешавад, иттилоъ медиҳад АМИТ «Ховар» бо истинод ба хадамоти матбуоти Раиси вилояти Суғд.

Иншооти муҳташам аз тарафи Ҷамъияти дорои масъулияти маҳдуди «Мабдаи Нур», ки фармоишгар ва пудратчии он мебошад, сохта шуда, лоиҳаи маҷмаа аз ҷониби ширкати лоиҳакашии «Архиком-К»-и шаҳри Душанбе дар якҷоягӣ бо мутахассисони Қазоқистон омода шудааст.

Дар ошёнаи якуми маҷмаа дар 4500 метри   мураббаъ  мағозаи бузург, ки дар як вақт ба 500 мизоҷ хизмат мерасонад, бунёд мегардад. Дар ошёнаҳои дигар маркази савдо ва хизматрасонӣ, аз ҷумла  мағозаҳои фурӯши маҳсулоти ҳунарҳои мардумӣ ва армуғонҳо барои сайёҳон, нуқтаи хизматрасонӣ ба сайёҳони дохилию хориҷӣ, қаҳвахона, ошхона, кинотеатр ва нуқтаҳои хизматрасонӣ ташкил мегарданд.

Дар айни замон охирин корҳои сохтмонӣ ҷараён дошта, дар назар аст, ки бо мавриди истифода қарор гирифтани маҷмаа даҳҳо нафар бо ҷойи кор таъмин гарданд.

Ҳамзамон дар шаҳри Истаравшан сохтмони Маркази савдои «Амид», маркази тиббӣ-ташхисии «Салоҳиддин» ва корхонаи истеҳсоли обҳои ташнагишикани Ҷамъияти дорои масъулияти маҳдуди «Дӯстӣ» идома дорад.

 АКС: Хадамоти матбуоти Раиси вилояти Суғд