Ширкати «Carpi» дар бунёди неругоҳҳои барқи обӣ дар дарёи Зарафшон иштирок менамояд

ДУШАНБЕ, 21.02.2025 /АМИТ «Ховар»/. Ширкати фаронсавии «Carpi» барои иштирок дар татбиқи лоиҳаҳои афзалиятноки соҳаи энергетикаи Тоҷикистон изҳори омодагӣ намуд, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

Дар Душанбе зимни мулоқоти роҳбарияти Вазорати энергетика ва захираҳои оби Ҷумҳурии Тоҷикистон ва ширкатҳои энергетикии мамлакат бо намояндагони ширкати «Carpi»-и Фаронса тавсеаи ҳамкорӣ бо ин ширкати фаронсавӣ дар соҳаи энергетика баррасӣ гардид.

Дар ҷараёни мулоқот намояндагони ширкати «Carpi» рӯнамои фаъолияти ширкатро пешниҳод намуда, доир ба иқтидор, таҷрибаи байналмилалӣ ва лоиҳаҳои амалинамудаи он, бахусус дар самти бунёди сарбандҳои неругоҳҳои барқи обӣ дар давлатҳои гуногуни ҷаҳон маълумот доданд.

Дар ҷараёни муколамаи ҷонибҳо намояндагони ширкати «Carpi» барои иштирок дар татбиқи лоиҳаҳои афзалиятноки соҳаи энергетикаи Тоҷикистон, аз ҷумла бунёди неругоҳҳои барқи обӣ дар дарёи Зарафшон ҳавасмандӣ зоҳир намуданд.

АКС: Вазорати энергетика ва захираҳои оби Ҷумҳурии Тоҷикистон