Дар ноҳияи Дарвоз ҳашарҳои экологӣ гузаронида шуданд

ДУШАНБЕ, 16.03.2025 /АМИТ «Ховар»/. Дар остонаи Ҷашни байналмилалии Наврӯз бо мақсади  тозаю озода нигоҳ доштани муҳити зист, тақвияти  корҳои созандагию ободонӣ бо иқдоми бахши ҳифзи муҳити зист ва Мақомоти иҷроияи ҳокимияти давлатии  ноҳияи Дарвоз ҳашарҳои экологии «Тозагии соҳил», «Тозагии маҳал» ва «Тозагии шоҳроҳ» гузаронида шуданд, ки дар натиҷа қад-қади соҳили дарёи Панҷ ва дарёчаҳои Девдара, Ҷорф ва Тоғмай аз партовҳои маишӣ ва истеҳсолӣ тоза карда шуд.

АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад, ки дар ҳашарҳои экологии «Тозагии соҳил», «Тозагии маҳал» ва «Тозагии шоҳроҳ» сокинони деҳаҳои Кеврон, Ҷорф, Вишхарв, Тоғайма ва Ҷамоати деҳоти Вишхарви ноҳияи Дарвоз фаъолона иштирок намуданд.

Зимни ҳашарҳои «Тозагии соҳил», «Тозагии маҳал» ва «Тозагии шоҳроҳ» 1 метри мураббаъ партовҳо дар масофаи 2,5 километр ҷамъоварӣ гардида, ба ҷойи муайян интиқол дода шуд.

Ҳамзамон шафати роҳи байналмилалии Қалъаихум-Хоруғ ва маҳаллаҳои аҳолинишин ба масофаи 4,5 км аз алафҳои бегона ва партовҳои гуногун тоза карда шуда, 2,5 метри  мураббаъ партов ҷамъоварӣ гардид.

 АКС: Кумитаи ҳифзи муҳити  зисти назди Ҳукумати Ҷумҳурии Тоҷикистон