Кормандони Суди конститутсионии Тоҷикистон Наврӯзи оламафрӯзро бо риояи оинҳои миллӣ таҷлил намуданд

  ДУШАНБЕ, 27.03.2025. /АМИТ «Ховар»/. Дар Суди конститутсионии Ҷумҳурии Тоҷикистон бахшида ба Наврӯзи оламафрӯз ҳамоиши фарҳангию маърифатӣ баргузор гардид. Дар ин хусус АМИТ «Ховар» бо истинод ба Суди конститутсионии Ҷумҳурии Тоҷикистон хабар медиҳад.

Зимни ҳамоиши фарҳангӣ иброз гардид, ки Наврӯз ва анъанаю суннатҳои неки он бо шарофати сиёсати башардӯстонаи Пешвои миллат муҳтарам Эмомалӣ  Раҳмон мавқеи ҷаҳонӣ касб намудаанд, ки боиси ифтихори  ҳар сокини мамлакат мебошад.

Ҷавҳари таърихию фарҳангии Наврӯз саодату пирӯзии аҳли башар буда, инсонҳоро ба ҳамдигарфаҳмию ҳамзистии осоишта,  накӯкорию созандагӣ, дӯст доштану эҳтиёт кардани табиат ва неъматҳои он ҳидоят менамояд. Ин ҷашни бузурги бостонӣ бо обу хок, марзу бум ва руҳи зиндагисозу тамаддунофари халқи тоҷик пайванди ногусастанӣ дорад. Ҳамин аст, ки расму ойинҳои он дорои рамзҳое мебошанд, ки аз қадим то имрӯз бо рӯзгори мардуми созандаву ободгар ва фарҳангию таҳаммулгарои мо созгор мебошанд. Аз ин рӯ, бо итминони комил метавон гуфт, ки «Тоҷикистон Ватани Наврӯз аст».

Кормандони Суди конститутсионӣ  Наврӯзи оламафрӯзро бо руҳияи баланди миллӣ ва ифтихор аз давлату давлатдорӣ, худшиносию худогоҳӣ ҳамчун пайвандгари дирӯзу имрӯз, суннату анъанаҳои неки ниёгон, решапайванди наслҳо, бозгашт ба асли хеш ва эҳёи беҳтарин расму ойин ва анъанаҳои миллии халқамон таҷлил карда, таманно намуданд, ки бахту саодат ва хайру баракат дар хонадони тамоми аҳли башар ва сулҳу субот дар тамоми олам ҷовидонӣ бошад.

АКС: Суди конститутсионии Ҷумҳурии Тоҷикистон