Ҳамкории Тоҷикистон бо Комиссияи иқтисодию иҷтимоии СММ барои Осиё ва Уқёнуси Ором баррасӣ гардид

ДУШАНБЕ, 26.04.2025 /АМИТ «Ховар»/. 24 апрел Сафири Фавқулода ва Мухтори Ҷумҳурии Тоҷикистон дар Малайзия, Намояндаи доимии Ҷумҳурии Тоҷикистон дар назди Комиссияи иқтисодию иҷтимоии Созмони Милали Муттаҳид барои Осиё ва Уқёнуси Ором (UNESCAP)  Ардашер Қодирӣ бо муовини Дабири кулли Созмони Милали Муттаҳид ва Котиби иҷроияи ниҳоди мазкур (UNESCAP) Армида Салсиаҳ Алисҷаҳбана мулоқот намуд.

Тавре АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад, зимни мулоқот масоили ҳамкории Тоҷикистон бо Комиссияи иқтисодию иҷтимоии Созмони Милали Муттаҳид барои Осиё ва Уқёнуси Ором (UNESCAP), бахусус дар бахши обу иқлим, ҳифзи пиряхҳо ва тақвияти ҳамкории ниҳоди мазкур бо вазорату идораҳои мамлакат дар самтҳои мухталиф мавриди баррасӣ қарор гирифт.

Ёдовар мешавем, ки мулоқот дар  ҳошияи иҷлосияи 81-уми Комиссияи иқтисодию иҷтимоии Созмони Милали Муттаҳид барои Осиё ва Уқёнуси Ором (UNESCAP) доир шуд.

АКС: Вазорати корҳои хориҷии Ҷумҳурии Тоҷикистон