Дар Боғи «Агробиолабораторӣ»-и Донишгоҳи давлатии омӯзгорӣ корхонаи истеҳсоли моеъҳои шӯянда ва косметологӣ сохта мешавад

ДУШАНБЕ, 08.04.2025. /АМИТ «Ховар»/. 7 апрел дар ҳудуди Боғи «Агробиолабораторӣ»-и Донишгоҳи давлатии омӯзгории Тоҷикистон ба номи Садриддин Айнӣ ба сохтмони корхонаи хурди истеҳсоли моеъҳои шӯянда ва косметологӣ оғоз бахшида шуд.

Корхона дар 0,6 гектар бунёд гардида, дар он зиёда аз 20 намуди моеъҳои шӯянда ва косметологӣ истеҳсол карда мешавад.

Масъалаи пешрафти илму маориф ва татбиқи он дар истеҳсолоту иқтисодиёти мамлакат дар меҳвари вохӯрии Президенти Тоҷикистон бо аҳли илм ва маорифи ҷумҳурӣ қарор дошт. Маҳз дар ҳамин замина бо истифода аз иқтидори илмии донишгоҳ ва ҳамкории байналмилалии он чунин корхона сохта шуда, пайванди илм бо истеҳсолот амалӣ карда мешавад.

Бояд иброз намуд, ки барои иҷрои саривақтии дастуру супоришҳои Сарвари давлат вобаста ба пайвасти илм бо истеҳсолот дар Парки технологии назди донишгоҳ мизу курсӣ барои муассисаҳои таҳсилоти миёнаи умумӣ ва олии касбӣ, ошхона, роҳаткурсиҳо барои толорҳои маҷлисӣ, минбарҳо, ҷевон барои китоб ва рахти хоб истеҳсол шуда,  шиору овезаҳо нашр мешаванд.

Парки технологии Донишгоҳи давлатии омӯзгории Тоҷикистон яке аз паркҳои муваффақ дар байни паркҳои муассисаҳои таҳсилоти олии касбии мамлакат мебошад.

АКС: Донишгоҳи давлатии омӯзгории Тоҷикистон ба номи Садриддин Айнӣ