ДАРАХТ БИНШОН! Дар ноҳияи Лахш беш аз 11 ҳазор бех ниҳоли мевадиҳанда ва ҳамешасабз шинонида шуд

ЛАХШ, 29.04.2025 /АМИТ «Ховар»/. Бо ташаббуси Мақомоти иҷроияи ҳокимияти давлатии ноҳияи Лахш  дар ҳудуди ҷамоатҳои шаҳраку деҳоти ноҳия ба тариқи ҳашарҳои ниҳолшинонӣ беш аз 11 ҳазор бех ниҳоли мевадиҳанда ва ҳамешасабзу ороишӣ шинонида шудааст. Дар ин хусус мудири бахши ҳифзи муҳити зисти ноҳияи Лахш Эраҷ Камолов  ба хабарнигори АМИТ «Ховар» Субҳониддини Маҳмуд иттилоъ дод.

Мувофиқи нақша, солҳои 2024-2025 дар ноҳияи Лахш бояд 12 ҳазор  бех ниҳол ва зиёда аз 2000 ҳазор адад гулу буттаҳо шинонида шаванд. Хушбахтона, сокинони ноҳияи Лахш дар доираи иҷрои амалии нишондиҳандаҳои Паёми Президенти Ҷумҳурии Тоҷикистон ба Маҷлиси Олӣ ва ҳифзи муҳити зист масъулият ҳис намуда, то охири мавсим нақшаи дарахтшинонию сабзазоркуниро барзиёд иҷро менамоянд.

Директори Муассисаи давлатии Хоҷагии ҷангали ноҳияи Лахш Шамсиддин Шарифзода иброз дошт, ки дар ҳудуди заминҳои Хоҷагии ҷангали ноҳия то имрӯз  10 гектар ҷангали нав бунёд ва  50 гектар ҷангал  барқарор карда шуд. Мувофиқи нақша, то охири мавсими ниҳолшинонӣ бунёди ҷангалзор ва барқарор намудани  ҷангалҳои азбайнрафта идома меёбад.  Дар заминҳои хоҷагии ҷангал бештар дарахтони мевадиҳандаи чормағз, хуч, себ, нок, олуча ва ороишии сӯзанбаргу сафедор шинонида мешаванд.

Инчунин вобаста ба иҷрои «Барномаи рушди парвариши павлония дар Ҷумҳурии Тоҷикистон  барои солҳои 2024-2028» дар мавзеи Хушҳоли ноҳия дар  70 садяк дарахти павлония шинонида шудааст. Парвариши он дар ҳолати хуб буда, дар оянда шинонидани ниҳолҳои павлония идома меёбад.

Дар ҷамоатҳои шаҳраку деҳоти ноҳияи Лахш ниҳолҳои дарахтон бо тавсияи мутахассисон ва бо риояи қоидаҳои агротехникию мутобиқ ба минтақа шинонида мешаванд.

Дар маъракаҳои ниҳолшинонӣ кормандони  Мақомоти иҷроияи ҳокимияти давлатии ноҳияи Лахш,  сохторҳои гуногуни ноҳия ва сокинони ҷамоатҳои шаҳраку деҳот фаъолона иштирок намуда, дар ободонии ноҳия саҳм мегузоранд.

 АКС аз бойгони