Даъватшавандагони шаҳри Норак ба ватандӯстӣ ва ҳифзи амнияти миллӣ даъват шуданд

ДУШАНБЕ, 02.04.2025. /АМИТ «Ховар»/. 31 март дар саҳни Комиссариати ҳарбии шаҳри Норак  бахшида ба Рӯзи даъватшаванда ҳамоиши бошукуҳи тантанавӣ баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Норак иттилоъ доданд.

Зимни ҳамоиш ба наваскарон барои хизмати хубу софдилона ба Ватан-Модар барору комёбӣ таманно намуданд.

Таъкид гардид, ки дар заминаи таваҷҷуҳ ва дастгириҳои Сарфармондеҳи Олии Қувваҳои Мусаллаҳи Ҷумҳурии Тоҷикистон, Пешвои миллат муҳтарам Эмомалӣ Раҳмон сол то сол шароити хизмат дар қисмҳои ҳарбии мамлакат беҳтар мегардад.

Дар маросими гусели даъватшавандагон падару модарон, ҷанговарони башардӯст, фаъолон ва собиқадорони меҳнат сухан гуфта, онҳоро ба дӯст доштани Ватан ва ҳифзи суботу амнияти он даъват намуданд.

Ҷавононе, ки барои адои хизмати ҳарбӣ дар даъвати баҳорӣ ба таври ихтиёрӣ ба Комиссариати ҳарбии шаҳр омада буданд, бо ибтикори Мақомоти иҷроияи ҳокимияти давлатии шаҳри Норак ба даврҳои кӯтоҳмуддати омӯзиши ронандагӣ фаро гирифта шуда, соҳиби шаҳодатномаҳои ронандагӣ шуданд.

Дар шаҳри Норак барои дар руҳияи хештаншиносӣ тарбия намудани ҷавонон, хосса насли ояндасози мамлакат пайваста барномаҳои гуногуни фарҳангию маърифатӣ доир карда мешаванд.

   АКС: Мақомоти иҷроияи ҳокимияти давлатии шаҳри Норак