35-СОЛАГИИ ИСТИҚЛОЛИ ДАВЛАТӢ. 2 километр роҳи деҳаи Ҳақиқати шаҳри Турсунзода бетонпӯш мегардад

ДУШАНБЕ, 01.05.2025. /АМИТ «Ховар»/.  Бахшида ба 35-солагии Истиқлолияти давлатии Ҷумҳурии Тоҷикистон бо ташаббуси сокинони деҳаи Ҳақиқати Ҷамоати деҳоти Турсун Тӯйчиеви шаҳри Турсунзода 2 километр роҳи ин деҳа бетонпӯш мегардад. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Турсунзода хабар доданд.

Роҳи деҳаи Ҳақиқат солҳои зиёд таъмирталаб буда, рафтуомади сокинону воситаҳои нақлиёт мушкил буд.

Бо мақсади шиносоӣ бо ҳашари дастҷамъонаи сокинон   Раиси шаҳри Турсунзода Парвиз Акрамзода дар деҳаи Ҳақиқат бо сокинон суҳбат намуда, онҳоро ба иттиҳоду сарҷамъӣ ва расидан ба қадри сулҳу суботи комили Ватан даъват намуд.

Ин иқдоми неку созандаи сокинон минбаъд низ идома дода мешавад. Баъди анҷоми бетонпӯш кардани роҳи деҳа аҳолӣ ният доранд, ки корҳои дигари ободониро анҷом диҳанд.

Дар ҷамоату деҳоти шаҳри Турсунзода бо иқдоми мақомоти иҷроияи ҳокимияти давлатии шаҳр, фаъолону сокинони ватандӯст ва  соҳибкорони саховатпеша корҳои тармиму навсозии роҳҳои маҳаллӣ ва дигар  тадбирҳои   ободкорона вусъат меёбанд.

АКС: Мақомоти иҷроияи ҳокимияти давлатии шаҳри Турсунзода