35-СОЛАГИИ ИСТИҚЛОЛИ ДАВЛАТӢ. Дар Истаравшан 990 иншоот бунёд, таъмир ва навсозӣ карда мешаванд

ДУШАНБЕ, 18.05.2025. /АМИТ «Ховар»/. Ба истиқболи ҷашни 35-солагии Истиқлоли давлатӣ дар шаҳри Истаравшани вилояти Суғд 990 иншооти таъйиноти иҷтимоию иқтисодӣ бунёд, таъмир ва навсозӣ карда мешаванд. Аз ин шумора то имрӯз 664 адади он мавриди истифода қарор гирифтааст.

Тавре ба АМИТ «Ховар» аз хадамоти матбуоти Раиси вилояти Суғд иттилоъ доданд, дар шаҳр маркази хизматрасонии «Ром ойл»  бо ташаббуси соҳибкор Муҳаммадҷон Қобилов сохта шудааст. Дар ин марказ хизматрасонии таъмиру шустани нақлиёт амалӣ ва ҳамзамон маҳсулоти ватанӣ ба фурӯш гузошта мешавад.

Равғанҳои молиданӣ ва моеи антифриз, ки барои воситаҳои нақлиёт зарур мебошанд, аз ҷониби Ҷамъияти дорои масъулияти маҳдуди «Кайҳоннавард» истеҳсол карда мешаванд.

Ҷамъияти дорои масъулияти маҳдуди «Кайҳоннавард» нақша дорад, ки фаъолияташро боз ҳам тақвият бахшида, ҳаҷми истеҳсоли равғанҳои молиданӣ ва дигар маҳсулоти техникиро афзоиш диҳад.

Дар шаҳри Истаравшан маркази хизматрасонии «Сомон бренд»  ба истифода дода шудааст.  Дар ин марказ, ки замонавӣ аст, либосҳои мардона, кӯдакона, пойафзол ва дигар маҳсулоти рӯзгор ба харидорон пешниҳод карда мешаванд.

АКС: Хадамоти матбуоти Раиси вилояти Суғд