«Роҳи оҳани Тоҷикистон» барои содироти маҳсулоти кишоварзӣ то 80 фоиз тахфиф пешниҳод намуд

ДУШАНБЕ, 23.05.2025 /АМИТ «Ховар»/. Корхонаи воҳиди давлатии «Роҳи оҳани Тоҷикистон» 20 вагони холиро дар ҳудуди истгоҳҳои роҳи оҳани «Ҷалолиддини Балхӣ», «Хатлон» ва «Шаҳритус» барои содироти пиёз омода карда, барои интиқолдиҳандагон ва нигоҳубини ҳосил тамоми шароитро фароҳам овардааст, иттилоъ медиҳад АМИТ «Ховар» бо истинод ба Вазорати нақлиёти Ҷумҳурии Тоҷикистон.

Инчунин дар маҷмааи нақлиётӣ-нигоҳдории шаҳри Левакант барои бастабандии пиёз биноҳо ҷудо карда шуда, маҷмаа дар мавзеи мувофиқ нисбат ба роҳи автомобилӣ ва роҳи оҳан ҷойгир шудааст. Ин имкон медиҳад, ки воситаи мустақими боркунии «автомобил – вагон» истифода бурда шавад.

Ҳамзамон Корхонаи воҳиди давлатии «Роҳи оҳани Тоҷикистон» беш аз 60 нафарро аз ҳисоби кормандон, инчунин занони хонанишин аз шаҳрҳои Бохтар, Левакант ва ноҳияи Ҷалолиддини Балхӣ ба корҳои бастабандӣ, боркунӣ ва борфарорӣ ҷалб намудааст.

Барои содироти маҳсулоти кишоварзӣ, аз ҷумла пиёзи барвақтӣ тавассути истгоҳҳои роҳи оҳани «Ҷалолиддини Балхӣ», «Хатлон» ва «Шаҳритус» корхона то 80 фоиз тахфиф пешниҳод намуда, уҳдадор шудааст, ки борро дар муҳлати муқарраршуда то истгоҳи «Келес»-и Узбекистон расонад. Маъмурияти «Роҳи оҳани Узбекистон» низ барои содироти пиёз то 60 фоиз тахфиф эълон кардааст.

Ба ҳолати то 21 майи соли 2025 аз ҷониби истгоҳҳои роҳи оҳани вилояти Хатлон 4 вагон ё 240 тонна пиёзи барвақтӣ содир карда шудааст.

Дар вилоят пиёзи барвақтии навъи ватании «Ҷайҳун» парвариш карда мешавад, ки ҷамъоварии ҳосили он қариб анҷом меёбад. Танҳо дар ноҳияи Панҷ барои он 370 гектар ҷудо карда шудааст. Хоҷагиҳои фермерӣ тасмим гирифтаанд аз ин миқдор замин на камтар аз 10 ҳазор тонна ҳосили босифат ҷамъоварӣ карда, маҳсулоташонро на танҳо ба бозори дохилӣ бароранд, балки ба кишварҳои ҳамсоя – Узбекистон, Қирғизистон ва Қазоқистон низ содир намоянд. Дар сатҳи вилоят имсол дар 14 054 гектар пиёз кишт карда шуда, деҳқонон ният доранд, ки 473 131 тонна ҳосил ҷамъоварӣ намоянд.

Ёдовар мешавем, ки Президенти Ҷумҳурии Тоҷикистон муҳтарам Эмомалӣ Раҳмон дар семинар-машварати ҷумҳуриявӣ бо иштироки роҳбарони вазорату идораҳо, вилоятҳо ва шаҳру ноҳияҳо, ки 17 май дар ноҳияи Данғара баргузор гардид, изҳор доштанд, ки «вилояти Хатлон дорои иқтидори бузурги содироти меваю сабзавот, бахусус сабзавоти барвақтӣ мебошад, аммо истифодаи пурраи ин имконият ҳанӯз ба даст наомадааст».

Дар робита ба ин Сарвари давлат зарурати тақвияти корҳо оид ба сохтмони ду маркази агрологӣ дар ноҳияҳои Данғара ва Ҷалолиддини Балхиро барои васеъ кардани иқтидори содиротӣ таъкид намуданд.

Вазорати нақлиёти Тоҷикистон бо мақсади мусоидат ба содироти пиёзи барвақтӣ ба кишварҳои хориҷӣ гурӯҳи корӣ таъсис додааст. Аъзои гурӯҳ бо сарварии роҳбарияти вазорат ба вилояти Хатлон сафар анҷом дод.

АКС: Вазорати нақлиёти Ҷумҳурии Тоҷикистон