Дар Форуми байналмилалии иқтисодии Санкт-Петербург-2025 таҷрибаи Тоҷикистон дар соҳаи зеҳни сунъӣ муаррифӣ карда шуд
ДУШАНБЕ, 23.06.2025. /АМИТ «Ховар»/. Дар Форуми байналмилалии иқтисодии Санкт-Петербург-2025 таҷрибаи Тоҷикистон дар соҳаи зеҳни сунъӣ муаррифӣ гардид, иттилоъ медиҳад АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон.
Директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо дар доираи Форуми иқтисодии байналмилалии Санкт Петербург-2025 дар форуми ҷаласавии кишварҳои «БРИКС+» дар мавзӯи «Зеҳни сунъӣ» сухан намуд.
«Ҷумҳурии Тоҷикистон пайваста ба ташкили экосистемаи устувор ҷиҳати рушди самтҳои инноватсия ва рақамикунонӣ таваҷҷуҳи махсус зоҳир менамояд. Дар ин замина, Фармони Президенти Ҷумҳурии Тоҷикистон, муҳтарам Эмомалӣ Раҳмон, оид ба эълон гардидани солҳои 2025–2030 ҳамчун «Солҳои рушди иқтисоди рақамӣ ва инноватсия», иродаи сиёсати кишварро барои рақамикунонии занҷиравии тамоми соҳаҳои ҳаёти ҷомеа инъикос мекунад», — афзуд Хуршед Мирзо.
Ҳамзамон, дастовардҳо ва кӯшишҳои Тоҷикистон дар пешбурди технологияҳои зеҳни сунъӣ муаррифӣ ва ба аҳамияти онҳо дар рушди соҳаҳои гуногун таъкид гардид. Иштирокчиён саҳми назарраси Тоҷикистонро дар низомҳои минтақавӣ ва ҷаҳонии зеҳни сунъӣ эътироф карданд.
Мавзуъи меҳварии Форуми иқтисодии байналмилалии Санкт Петербург-2025 — Арзишҳои муштарак – таҳкурсии рушд дар ҷаҳони бисёрқутбӣ» («Common Values – The Foundation of Growthin a Multipolar World») арзёбӣ гардид. Инчунин, дар доираи форуми глобалӣ форумҳои ҷаласавии Созмони ҳамкории Шанхай, БРИКС +, G20, саноати эҷодӣ ва саноати дорусозӣ баргузор шуд.
Дар чорабинӣ намояндагони беш аз 140 кишвар, аз ҷумла намояндагони воломақом, роҳбарон ва намояндагони давлатии кишварҳо, бахши хусусӣ иштирок намуданд. Ҳузури васеи намояндагони байналмилалӣ шаҳодати таваҷҷуҳи афзоянда атрофи мавзуъҳои баррасишаванда дар рушди муносибатҳои иқтисодӣ мебошад.
Мавриди ёдоварист, ки баргузор гардидани чунин ҳамоиш рӯйдоди муҳим дар муҳокимаи ҷаҳонии зеҳни сунъӣ, эҷоди имкониятҳо барои рушди устувор ва муаррифии таҷрибаи Тоҷикистон дар самти зеҳни сунъӣ дар байни кишварҳои иштирокчӣ маҳсуб меёбад.
АКС: Агентии инноватсия ва технологияҳои рақамии назди Президенти Ҷумҳурии Тоҷикистон
Дар Душанбе истифода ва ҳифзи захираҳои обии мамлакат дар шароити тағйирёбии иқлим баррасӣ гардид
Ҷаласаи сеюми Гурӯҳи кории муштараки Тоҷикистону Покистон оид ба савдо, сармоягузорӣ ва нақлиёт баргузор шуд
Бонки миллии Тоҷикистон ба Эъломияи Кейптаун ҳамроҳ шуд
35-СОЛАГИИ ИСТИҚЛОЛИ ДАВЛАТӢ. Дар ноҳияи Восеъ сохтмони иншооти таъйиноти гуногун идома дорад
Дар Душанбе натиҷаҳои COP30 ва раванди такмилсозии NDC 3.0-и Тоҷикистон баррасӣ гардид
«ТОП – 35 ШАРИКИ БОЭЪТИМОДИ СОЛ». Ба муносибати 35-солагии Истиқлолияти давлатӣ озмун баргузор мегардад
Дар ноҳияи Деваштич Маркази ҷумҳуриявии инноватсия ва технологияҳо дар соҳаи картошкапарварӣ таъсис дода мешавад
Бахшида ба Рӯзи байналмилалии ҳимояи ҳуқуқи истеъмолкунандагон корҳои фаҳмондадиҳӣ доир гардид
ИМРӮЗ-РӮЗИ БАЙНАЛМИЛАЛИИ ҲИМОЯИ ҲУҚУҚИ ИСТЕЪМОЛКУНАНДАГОН. Зиёда аз 86 тонна маҳсулоти бесифати бозорҳои истеъмолӣ нобуд карда шуд
Байни ширкати ҳавопаймоии хусусии «Shohin Airlines» ва Бунёди сармоягузории аврупоӣ Созишномаи сармоягузорӣ ба имзо расид
Ҷаласаи Гурӯҳи кории байниидоравӣ оид ба мониторинг ва арзёбии ҳуҷҷатҳои банақшагирии стратегӣ доир гардид
Дар Вашингтон дурнамои ҳамкории Тоҷикистон бо Бонки ҷаҳонӣ дар самти рушди инфрасохтори роҳу нақлиёт баррасӣ шуд
