Дар Хуҷанд Форуми байналмилалии «Имкониятҳои тиҷоратӣ, сармоягузорӣ ва дурнамои ҳамкорӣ» баргузор гардид

Июнь 12, 2025 17:20

ДУШАНБЕ, 12.06.2025. /АМИТ «Ховар»/. Имрӯз дар доираи Намоишгоҳи байналмилалии тиҷоратии «Суғд – 2025» дар шаҳри Хуҷанд Форуми байналмилалии «Имкониятҳои тиҷоратӣ, сармоягузорӣ ва дурнамои ҳамкорӣ» баргузор шуд. Дар форум зиёда аз 500 меҳмон беш аз 20 давлати ҷаҳон иштирок доранд. Дар ин хусус ба АМИТ «Ховар» аз хадамоти матбуоти Раиси вилояти Суғд иттилоъ доданд.

Таъкид гардид, ки «натиҷаи сиёсати «дарҳои боз» ва ҳамкории фаъолонаи Ҷумҳурии Тоҷикистон бо ҷомеаи ҷаҳонӣ аст, ки имрӯз имкони баргузории чунин форумҳои байналмилалӣ фароҳам омадааст. Форуми имрӯза ба як майдони муҳими муколамаи судманд ва рушди робитаҳои дуҷониба ва бисёрҷонибаи иқтисодию тиҷоратӣ мубаддал гардид».

Раиси вилояти Суғд аз сиёсати оқилонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ёдовар шуда, таъкид намуд, ки маҳз ҳамин сиёсати устувору дурбинона шароити мусоидро барои рушди иқтисод, озодии соҳибкорӣ ва ҷалби сармоя фароҳам овардааст.

Иттилоъ дода шуд, ки дар панҷ соли охир ба иқтисодиёти вилояти Суғд беш аз 4 миллиард доллари амрикоӣ сармоя ҷалб гардидааст. Айни замон дар вилоят 18 лоиҳаи давлатии сармоягузорӣ ба маблағи умумии зиёда аз 250 миллион доллар амалӣ шуда истодааст.

Иброз гардид, ки Форуми имрӯза барои тақвияти робитаҳои иқтисодӣ ва татбиқи лоиҳаҳои муштарак дар соҳаҳои гуногун заминаи устувор мегузоранд.

Дар доираи барномаи Намоишгоҳи байналмилалии «Суғд – 2025», баргузории машваратҳо, муаррифии лоиҳаҳо, намоишгоҳи маҳсулоти саноативу кишоварзӣ, вохӯриҳои дуҷониба байни соҳибкорон, инчунин имзои санадҳои ҳамкорӣ дар назар аст.

Ёдовар мешавем, ки аз 12 то 14 июн дар шаҳри Хуҷанд Намоишгоҳи байналмилалии савдо «Суғд-2025» ва Форуми имконоти тиҷоратӣ ва сармоягузорӣ ва дурнамои рушди минтақа доир мегардад.

Ҳадафи намоишгоҳ дастгирии савдои байналмилалӣ, баланд бардоштани неруи содиротӣ, тавсеаи ҳамкории судманд бо давлатҳои хориҷии дуру наздик, ҷалби сармоя, воридсозии технологияи нав, густариши ҳамкорӣ байни давлатҳои минтақа ва созмонҳои байналмилалии молиявӣ мебошад.

Намоишгоҳи байналмилалии савдо «Суғд-2025» майдони хуб барои пешниҳод, баррасӣ ва таҳияву татбиқи лоиҳаҳо буда, дар он ширкату корхонаҳои истеҳсолии Тоҷикистон маҳсулоти гуногунро муаррифӣ менамоянд ва барои дарёфти бозори нав бо шарикони рушд созишномаҳои ҳамкорӣ ба имзо мерасонанд.

АКС: Хадамоти матбуоти Раиси вилояти Суғд

Июнь 12, 2025 17:20

Хабарҳои дигари ин бахш

НИШАСТИ МАТБУОТӢ. Агентии «Тоҷикстандарт» ба зиёда аз 21 ҳазор миқдор молу маҳсулот сертификати мутобиқат дод
Бахшида ба ворид шудани дараи Алмосӣ ба Низоми мероси кишоварзии дорои аҳамияти ҷаҳонӣ дар Ҳисор ҳамоиши ҷумҳуриявӣ доир шуд
Сармоягузорони Чин бо фаъолияти Минтақаи озоди иқтисодии «Кӯлоб» шинос шуданд
Дар хоҷагиҳои моҳипарварии Тоҷикистон 1906 тонна моҳӣ истеҳсол карда шуд
НИШАСТИ МАТБУОТӢ. Ҳаҷми гардиши савдои хориҷии Тоҷикистон зиёда аз 4,7 миллиард долларро ташкил дод
Содироти маҳсулоти кишоварзии Тоҷикистон ба хориҷ дар шаш моҳи соли 2025 ба 33,9 миллион доллар расид
Дурнамои ҳамкории Тоҷикистон бо Хазинаи байналмилалии асъор баррасӣ гардид
Ангурпарварӣ дар вилояти Суғд рушд меёбад
Дар шаш моҳ дар Тоҷикистон 659 тонна асал истеҳсол карда шудааст
Нашри сеюми Китоби сурхи Ҷумҳурии Тоҷикистон муаррифӣ гардид
«ПОМИРИНВЕСТ-2025». Барои рушди иқтисодӣ ва сармоягузории шаҳри Хоруғ 17 созишномаи ҳамкорӣ ба имзо расид
Ҳайати меҳмонон аз Муғулистон бо фаъолияти Неругоҳи барқи обии «Норак» шинос гардид