Дар Тоҷикистон беш аз 225 ҳазор тонна хӯроки чорво захира шудааст

ДУШАНБЕ, 08.06.2025. /АМИТ «Ховар»/. То аввали моҳи июн дар хоҷагиҳои кишоварзӣ ва деҳқонии ҷумҳурӣ 225 707 тонна хӯроки дурушти чорво захира шудааст. Дар ин хусус ба АМИТ «Ховар» аз Вазорати кишоварзии Ҷумҳурии Тоҷикистон иттилоъ доданд.

Ҳамасола дар мамлакат аз аввали фасли тобистон то охири фасли тирамоҳ хӯроки чорво захира мегардад. Ҳадафаи захираи хӯроки чорво дар фасли зимистон бозори истеъмолии мамлакатро бо гӯшту шир таъмин намудан аст.

Имсол кишоварзони хоҷагии деҳқонии «Далер-90»-и Ҷамоати деҳоти Сафобахши ноҳияи Балҷувон нақша доранд, ки зиёда аз 500 тонна хӯроки чорворо ҷамъоварӣ ва захира намоянд.

Айни замон маъракаи ҷамъоварии хӯроки сабзи чорво, аз ҷумла беда ва ҷави сабз бо вусъат идома дошта, кишоварзон барои таъмин намудани хоҷагиҳои худ бо хӯроки зарурӣ талош меварзанд.

Дар шароити мураккаби тағйирёбии иқлим ва камбуди манбаъҳои об, ҷамъоварии саривақтии хӯроки чорво ва захираи кофии он яке аз ҷузъҳои муҳими таъмини амнияти озуқаворӣ ва рушди устувори соҳаи чорводорӣ маҳсуб меёбад.

АКС: Хадамоти матбуоти Раиси вилояти Хатлон