Илҳомҷон Оймуҳаммадзода: «Пиряхҳо на танҳо массаҳои ях, балки бойгонии зиндаи геологӣ мебошанд»

Июнь 8, 2025 17:10

ДУШАНБЕ, 08.06.2025. /АМИТ «Ховар»/. Пиряхҳо танҳо массаҳои ях нестанд, онҳо бойгонии зиндаи геологӣ мебошанд, ки дар онҳо таърихи сайёра, осори иқлими қадимӣ, офатҳои табиӣ ва ҳодисаҳои тектоникӣ рамзгузорӣ шудааст. Чунин иброз дошт сардори Саридораи геологияи назди Ҳукумати Ҷумҳурии Тоҷикистон Илҳомҷон Оймуҳаммадзода дар Конфронси байналмилалии сатҳи баланд оид ба ҳифзи пиряхҳо (29-31 май) зимни суҳбат бо хабарнигори АМИТ «Ховар».

«Пиряхҳо муҳимтарин шаклҳои табиӣ буда, ташаккул, гузариш ва таназзули онҳо ҷузъи ҷудонашавандаи давраи геологӣ мебошанд. Онҳо таъсири мутақобилаи омилҳои иқлимӣ ва тектоникиро дар давраи чорум инъикос менамояд»,-гуфт Илҳомҷон Оймуҳаммадзода.

Ӯ илова кард, ки ташаккули пиряхҳо дар шароити мувозинати муътадили манфии ҳарорат ба амал меояд. Дар раванди фишурдани қабати барф шаклҳои мобайнӣ — фирн ва неве ба вуҷуд меоянд, ки бо мурури замон ба яхҳои зиччи пирях табдил меёбанд.

«Аз нигоҳи динамикаи геологӣ пиряхҳо агентҳои фаъоли экзогенӣ мебошанд, ки метавонанд вазифаҳои эрозия, интиқол ва ҷамъшавии партовҳоро иҷро кунанд», — изҳор дошт сардори Саридораи геология.

Ба гуфтаи ҳамсуҳбати мо, синну соли пиряхҳо вобаста ба шароити иқлимию орографӣ дар доираи васеъ фарқ мекунад. Санҷиши радиокарбонии боқимондаҳои органикӣ дар таҳшинҳои зери пиряхӣ, таҳлили изотопҳои оксиген ва гидроген, инчунин омӯзиши қабати яхбандӣ имкон медиҳад, ки чаҳорчӯбаи хронологии ташаккули пиряхҳо муайян карда шавад.

Фосилаҳои пиряхӣ бо равандҳои тектоникӣ ва палеогеографӣ зич алоқаманд аст, яъне шикастаҳои фаъол ва ҳаракатҳои неотектоникӣ метавонанд таркиби ҳавзаҳои пиряхҳоро тағйир диҳанд. Яъне конҳои зер ва болои ях бо ҳаракатҳои замин ва таъсири ҷозиба алоқаманд буда, дар ташаккули муҳити атрофи пиряхҳо нақши муҳим доранд.

«Таназзули муосири пиряхҳо дар шароити гармшавии глобалӣ боиси фаъол шудани равандҳои хатарноки геологӣ, аз қабили ярч ва фаромадани сел, хурӯҷи кӯлҳои пиряхӣ, ҳаракати нишебиҳо ва яхбандии абадӣ мегардад»,-гуфт Илҳомҷон Оймуҳаммадзода.

Мавсуф афзуд, ки пиряхҳо системаҳои мураккаби геологӣ мебошанд, ки қобилияти дар муддати тӯлонӣ дар бораи шароити иқлимӣ, тектоникӣ ва геоморфологӣ ҷамъоварӣ карданро доранд. Омӯзиши онҳо имкон медиҳад, ки геохронологияи давраи чорум, аз нав барқарор кардани ҳодисаҳои палеогеографӣ ва пешгӯии хатарҳои геологиро муайян намояд.

«Дар шароити тағйирёбандаи иқлим мониторинги пиряхҳо барои арзёбии устувории муҳити табиӣ ва бехатарии геологии ҳудудҳо ба ҳисоб меравад», — баён дошт ҳамсуҳбати мо.

Моҳинави НАВРӮЗ,
АМИТ «Ховар»

АКС: АМИТ «Ховар»

Июнь 8, 2025 17:10

Хабарҳои дигари ин бахш

Президенти Ҷумҳурии Тоҷикистон Эмомалӣ Раҳмон дар чорабинии сатҳи баланди оғози Даҳсолаи байналмилалии амал оид ба илмҳои яхшиносӣ (криосферӣ), солҳои 2025-2034 иштирок ва суханронӣ намуданд
Инна Блюшенко аз Швейтсария: «Мақсад дорам забони ширину шевои тоҷикиро омӯзам»
Дар Тоҷикистон беш аз 225 ҳазор тонна хӯроки чорво захира шудааст
Губернатори Ҳукумати мардумии музофоти Шэнсии Чин бо фаъолияти Минтақаи озоди иқтисодии «Данғара» шинос шуд
Тоҷикистон дар муборизаи байналмилалӣ барои ҳифзи бабри барфӣ саҳм мегузорад
МАСЛИҲАТИ МУТАХАССИС. Норасоии намӣ ба решаи дарахтон самаранокии боғотро паст мекунад
Густариши ҳамкории вилояти Хатлон бо музофоти Шэнсӣ баррасӣ шуд
Дар Душанбе ҳамкории иқтисодӣ ва татбиқи лоиҳаҳои муштараки Тоҷикистону Чин баррасӣ гардид
РӮЗИ ҶАҲОНИИ БЕХАТАРИИ ОЗУҚАВОРӢ. Бо мақсади таъмини бехатарии маҳсулот дар Тоҷикистон 14 озмоишгоҳ фаъолият дорад
Сарфаи неруи барқ танҳо вазифаи давлатӣ нест, балки масъулияти ахлоқии ҳар як шаҳрванди мамлакат аст
Элиза Фернандес: «Маротибаи сеюм аст ба Тоҷикистон меоям, ҳар дафъа бештар ошиқи ин сарзамини кӯҳҳои баланд мешавам»
«IMPERIУA TECHSTREAM — 2025». Дар Душанбе барои наврасон нахустин озмуни технологияҳои иттилоотӣ баргузор гардид