Байни палатаҳои савдо ва саноати Тоҷикистону Қирғизистон Шурои корӣ таъсис дода мешавад

ДУШАНБЕ, 08.07.2025 /АМИТ «Ховар»/. Имрӯз пас аз анҷоми музокироти сатҳи олии Тоҷикистону Қирғизистон дар ҳузур ва бо иштироки Сарони давлатҳо муҳтарам Эмомалӣ Раҳмон ва муҳтарам Садир Жапаров маросими имзои санадҳои нави ҳамкорӣ баргузор гардид.

Созишнома оид ба таъсиси Шурои корӣ байни Палатаи савдо ва саноати Ҷумҳурии Тоҷикистон ва Палатаи савдо ва саноати Ҷумҳурии Қирғизистон ба имзо расонида шуд.

Санади ҳамкориро иҷрокунандаи Раиси Палатаи савдо ва саноати Ҷумҳурии Тоҷикистон Ҳайдар Раҷабзода ва Ноиби президенти Палатаи савдо ва саноати Қирғизистон Авазбек Керимбаев ба имзо расониданд.

Тавре ба АМИТ «Ховар» аз Палатаи савдо ва саноати Ҷумҳурии Тоҷикистон хабар доданд, таъсиси Шурои корӣ дар самти фаъол кардани робитаҳои иқтисодӣ, густариши робитаҳои мустақими соҳибкорон ва пешбурди лоиҳаҳои муштарак дар соҳаи тиҷорат ва сармоягузорӣ як қадами муҳим хоҳад буд.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»