Дар Федератсияи футболи Тоҷикистон ҷаласаи Кумитаи маркетинг баргузор шуд

ДУШАНБЕ, 11.07.2025 /АМИТ «Ховар»/. Дар Федератсияи футболи Тоҷикистон ҷаласаи Кумитаи маркетинг баргузор шуд, ки дар он масъалаҳои муҳими марбут ба рушди маркетинги футбол баррасӣ шуданд.Дар ин хусус ба АМИТ «Ховар» аз Федератсияи футболи Тоҷикистон хабар доданд.

Дар ҷаласаи кумита, ки таҳти раёсати ноиби президенти Федератсияи футболи Тоҷикистон Искандар Ҷалилов баргузор шуд, чанд самти муҳими маркетинги футбол – таҳкими робита бо мухлисон, рушди самти тиҷоратӣ, контент ва расонаҳо, инчунин мерчандайзинг баррасӣ шуд.

Ҳамзамон иштирокдорони ҷаласа ба масъалаи ҳамкорӣ бо ҷомеаи мухлисон таваҷҷуҳи хоса зоҳир намуданд. Дар чаҳорчӯби он тасмим гирифта шуд, ки бо раҳбарони гурӯҳи мухлисони бошгоҳҳои футболи Тоҷикистон мулоқоти васеъ ташкил карда, ташаббусҳои муштарак барои дастгирии фаъоли дастаҳои миллии Тоҷикистон дар варзишгоҳҳо баррасӣ карда шаванд.

Аъзои кумита инчунин механизмҳои ҷалби шарикон ва сарпарастони нав, инчунин роҳҳои баланд бардоштани самаранокии кор бо шарикони мавҷударо таҳлил намуданд.

АКС: Федератсияи футболи Тоҷикистон