Корхонаҳои саноатии вилояти Хатлон ба маблағи беш аз 5 миллиард сомонӣ маҳсулот истеҳсол намудаанд

ДУШАНБЕ, 16.07.2025 /АМИТ «Ховар»/. Корхонаҳои саноатии вилояти Хатлон дар 6 моҳи соли 2025 ба маблағи 5 миллиарду 627,8 миллион сомонӣ маҳсулот истеҳсол намуда, ҳаҷми истеҳсолро нисбат ба ҳамин давраи соли 2024 ба маблағи 634 миллион сомонӣ зиёд намуданд. Дар ин хусус зимни баргузории ҷаласа оид ба натиҷаҳои рушди иқтисодию иҷтимоии вилоят дар шашмоҳаи якуми соли 2025 иттилоъ дода шуд.

Давоми 6 моҳи соли равон аз ҷониби соҳибкорони маҳаллӣ 42 корхона ва коргоҳи нави саноатӣ бо таъсиси 278 ҷойи кор ба истифода дода шуд.

Бахшида ба ҷашни 35-солагии Истиқлоли давлатӣ дар вилоят таъмиру бунёди 6260 иншоот ба нақша гирифта шудааст. Ба ҳолати 1 июли соли равон 5479 иншоот бунёд шудааст, ки 87,5 фоизи нақшаро ташкил медиҳад.

Дар маҷмуъ дар миқёси вилоят ба масофаи 1420 километр роҳҳо аз ҳисоби ҳамаи манбаъҳо ба маблағи умумии 102,7 миллион сомонӣ таъмиру навсозӣ шудаанд. Ин нисбат ба ҳамин давраи соли 2024 ба маблағи 47,2 миллион сомонӣ зиёд мебошад.

АКС: Мақомоти иҷроияи ҳокимияти давлатии вилояти Хатлон